不經不覺，Supreme已有十年歷史，從一個美國板牌登上了世界街牌一哥的地位，當中日本仔追捧真係功不可沒。但成名後又有幾多人記得Supreme原本的意義？我想𠵱家瘋狂追捧Supreme的小朋友知道的沒幾多位。幸好Supreme並未忘本，將L.A.新舖內加入滑板臺，再與多年前曾合作的板鞋老大哥Vans推出別注板鞋，雖然就比不上之前兩對與Nike合作的DunkSB系列舒服，但勝在夠晒原汁原味。JamesJebbia（Supreme創辦人）最終都係覺得滑板較為重要，話晒呢位來自英國的潮人，都係靠它才有今日的成就。
記者：李崗華 攝影：林栢鈞
不講大家可能不知，Supreme與Vans的關係比Nike還要早得多。時間回到7、8年前，當年Supreme憑着滑板服飾剛於美冒出頭來，就與板鞋老牌Vans合作推出一系列的板鞋，Vans當年的經典鞋款SK8-Hi、OldSkool、Slip-on、Era及Chukka等等全部都出齊，但由於當年Supreme名氣不及現在，況且適逢美國街牌於港、日正處於低潮期，加上呢個合作計劃產量極少，所以不太多人會記得。今日，Supreme與Vans再度合作，鞋款與當年的一樣，都係以經典為主，不過大部份都加入了FBI檔案圖案，而此圖案亦經常出現於今季Supreme產品之內。不同當年之處是產量，今次的產量比起當年當然多了很多倍，單是各款的顏色差不多經已有15款，所以到港的售價係Supreme推出波鞋有史以來最平的一對，首日開賣$1,680，舊版Vans加上Supreme名氣，抵！
暫時到港的Supreme×Vans只有SK8-Hi一對咁多，不過各位唔使愁，其他款式陸續有來，睇住相先，因每款都可以預訂，每對價錢與SK8-Hi一樣，詳情可向店員查詢。
札根於美國紐約的Supreme，在9月11日於L.A.開設新舖，可算是一大潮事。為隆重其事，Supreme於9月9日在舖內開設Party，招呼各界好友。話晒係街牌一哥，開舖當日自不然吸引了大批信徒朝拜，一睹Supreme的新舖面貌，最重要的當然係Shopping，當日除推出Supreme×Vans之外，更係新貨推出之日，更有L.A.新舖特別版Tee發售，難怪日本原宿的人龍會於美國L.A.出現。
美國潮流雜誌《ARKITIP》新一期就為Supreme新舖出版特別號，隨書附送《ARKITIP》×SupremeF**kBushFingerboard，香港暫未有售。
今季矚目的除有Supreme×Vans外，當然尚有Supreme的成名作BoxTee復刻再加新色，其中最恨死人的，當然係經典的白底紅Box。
售賣點：SHIFT
28366860
銅鑼灣銀座商場66舖
