九龍城單幢樓博林軒，四十四個標準單位，兩日內火速沽清，造價接近發展商國際集團的意向呎價四千二。尚餘四伙係連天台同連平台單位，前者意向呎價五千七，後者五千一。聽講連平台單位已有準買家傾緊，發展商會送價值二十萬嘅園藝設計畀買家。
有見博林軒賣得咁快，國際集團董事鄺祖盛話，今個禮拜開會研究，加快重建步伐，其中位於九龍城嘅一幢三千幾呎舊樓，明年會拆卸重建，可建樓面三萬呎。𠵱家諗緊點開則，因為要有特色，或者會提供可以打通作相連單位嘅設計。佢又透露有意買埋隔籬幢舊樓，合併重建，但就唔傾向同小業主合作發展。
佢話，𠵱家大發展商連細地盤都搶，搞到中小型發展商好難買地。佢又透露，有意入標市建局未來推出嘅重建項目。
恒基地產派花紅同埋加人工嘅消息，噚日成為街頭巷尾談論話題，兩大代理行美聯同中原，噚日即刻有好消息公布。
美聯集團主席黃建業話，今年會恢復派雙糧，部份員工重有機會加人工。美記今年已派發過七次花紅，員工累積最多可以攞到六個月糧。
另一邊廂嘅中原地產，都即刻有相應行動，董事陳永傑表示，因今個月公司營業額已達一億二千五百萬目標，所有後勤同事都有五百蚊利是，十月一日重會有四分一個月糧花紅，計埋今次，今年以嚟，中記後勤員工共收到三千五百蚊利是，同個半月花紅。
百利大發展嘅山頂道八至十二號豪宅項目，自從年幾前差啲俾中銀接管之後，咁耐以嚟一直波折重重，淨係物業名都改過三次，到𠵱家都重未賣得。
百利大大股東翁麗蓮噚日請記者食飯，大家都以為個盤有新進展，點知兩粒鐘嘅飯局都冇料到，翁麗蓮對於樓盤嘅任何資料一概唔清楚，又唔肯評論吓本港豪宅市道，記者問乜，佢都叫市場銷售代理第一太平嘅人解答，最慘係一太嘅人遲到早退，講親都係重複上次記者會嘅資料，至於上次記招聲稱負責統籌成個樓盤嘅智匯公司高層，就更加連影都冇。
中原地產業務範圍愈嚟愈廣泛，為咗加強溝通，最近出咗本刊物，叫做「集團通訊」，創刊號梗唔少得由鍾意寫嘢嘅主席施永青親自撰文啦！
呢篇「應逐步建立集團觀念」嘅文章，蘭西較為留意講到集團內好多問題，好似點樣統一品牌、合理調配資源、協調內部矛盾同對外集體談判等。
答案係要從糾正一啲習以為常嘅錯誤思想入手，如只考慮自己任職單位局部利益，只睇眼前利益，同故步自封等。中記員工要打醒精神嘞。
新地荃灣爵悅庭噚日出動策劃總監朱國傑，親自介紹佔地八萬五千方呎嘅會所，最特別原來係佔地二萬呎嘅室內外泳池，原因何在？朱氏解釋，因為同區無，所以特別罕有。
另外，會所有部份設施會提供二十四小時服務，朱國傑重話，特別為空姐等機組人員，喺會所提供理髮美容等服務。噚日重介紹埋圖則，單位五百至三千呎，樓底特高，最頂三層嘅單位有十一呎幾。
𠵱家發展商賣樓，除咗要大搞密集式宣傳外，例牌菜係有印刷精美嘅樓書派畀買家。不過，30年前嘅售樓書就冇咁多姿多采，只係得幾頁紙，咁就用嚟賣樓嘞！可見時代變化幾大。
世紀21話，最近喺公司嘅資訊中心，搵到本七一年嘅售樓書，係大坑益群道五號大東洋樓，按地段計係豪宅，但售樓書好簡單，黑白封面，內頁重係手畫嘅，好似家具布置平面圖，都係手稿嚟嘅。蘭西記得間唔中見有啲售樓書，都有呢啲設計師嘅手畫設計圖，原來幾十年前已好流行。
呢個盤當年售價二十萬有找，單位面積約一千呎，重附連露台；𠵱家就梗係升值唔少啦。
淺水灣道一百一十七號豪宅GrosvenorPlace，近期陸續有拆售個案，原來個盤唔單止吸引買家，重俾新城財經台睇中，借嚟做該台邁向五周年酒會嘅地點。
酒會喺今日下晝五點半開始，蘭西睇番由第一太平戴維斯發出嘅採訪邀請，話信德主席何鴻燊同四太梁安琪，以及新世界鄭裕彤會出席，但寫明係暫定出席嘉賓，咁叫啲記者究竟去唔去採訪好呢？
蘭西
電郵地址：
