曾經同光頭影帝窪塚洋介演出電影《乒乓》嘅日本歌舞伎男演員中村獅童，前日喺東京日本橋嘅三越百貨內展開為期一星期、名為「中村獅童寫真展~馳騁黑闇的金獅~」嘅展覽，展出佢由細到大，以至演出舞台劇、拍攝電影時嘅相片，就連佢早前為宣傳西片《蜘蛛俠２》所着嘅蜘蛛俠衫都有展出，我羅拉就揀咗幾張最過癮嘅同大家分享吓。
其中一張中村戴冷帽就最得意，中村話佢兩歲時第一次見到真雪，當日佢阿媽怕佢凍親，所以特登將佢包到成隻糭咁；而中村喺高中最後一年嘅暑假去咗洛杉磯玩，着住米奇老鼠T恤同鴛鴦襪嘅中村都夠晒騎呢，估唔到經常為日本時裝雜誌影相嘅中村，都曾經有過呢個打扮！
前日中村就為佢嘅展覽主持開幕儀式，啱啱喺上周過咗三十二歲生日嘅中村話生日當日同一班朋友玩得好開心，不過係清一色男班，冇女仔喎。而佢同竹內結子拍完新戲《現在就去見你》後，繼續忙於為下月開始嘅歌舞伎表演排練。