今日上映的《機場客運站》，祝願各位看倌不會有像真人版伊朗人MerhanNasseri般，難民證被偷，88年起滯留巴黎戴高樂機場至今，苦守16年給搬上銀幕讓全球認識。不過，出外旅遊，幾小時的轉機時間或班機延誤總會發生，如不好好利用，簡直度日如年。今次我們訪問了幾位圈中名人，看他們怎麼利用這些時間，再諗諗可在機場裏加些甚麼設備造福大眾？
記者：陳慧敏
攝影：楊錦文
Model：Krie、家偉（StarAsia)
講起滯留機場，張堅庭01年因風雪滯留東京機場兩日的遭遇就最堅，當時一肚火，現在說起就得啖笑：「嘿嘿（冷笑），嗰次真係好混亂，機場冇水冇嘢食，日本旅客就有三文治食喎，我哋啲外地客就乜都冇！航空公司冇安排酒店畀我哋，結果成家人要瞓走廊，連毛毯都要自己走返上飛機攞！」人人都可以自由出入飛機與客運大樓的嗎？「咪就係囉！啲人（工作人員）都唔知去晒邊，成個機場亂晒大龍呀！」
最想香港機場加啲乜？
「唔使啦！畀間酒店房畀張床位我已經好夠喇！」
Kelly經常各地飛，班機延誤及3、4小時的轉機空檔遇過不少，然而美女瞓街成何體統？所以她都是跟助手聊聊天吃吃喝喝過日辰：「講真，香港機場個休息室又真係唔錯喎，雖然地方窄窄哋，但真係乾淨又舒服，又有髮型屋洗頭，我成日幫襯。重有禁區裏面嘅擔擔麵又幾好味！我同鍾珍次次入去都一定要食！」
最想香港機場加啲乜？
「梗係加Facial啦！出Trip好多時都唔夠瞓，如果可以利用轉機嗰3、4個鐘，啱啱好做個Facial瞓場覺，Fit呀！」
上天保佑，馬德鐘連班機延誤都沒遇過，但熱愛Shopping卻不便周圍去的他，滯留機場反而會因禍得福：「我好鍾意喺機場Shopping，所以每次都會提早兩個鐘頭入閘，行街買書同食嘢，有幾次重買到忘晒形，搞到要跑去閘口趕飛機，差啲上唔到機要滯留機場！」借這個機會，馬Sir更想向Fans們呼籲：「唔好再帶湯嚟送機！我見到你哋就已經好開心。飲完丟咗個壺又嘥，要我入閘前飲晒佢又到我好淒涼。」
最想香港機場加啲乜？
「可唔可以開多幾間舖頭俾我繼續Shopping？」
電影中湯漢斯滯留機場幾個月，雖然要瞓候機室、喺廁所沖涼，但時間夠，重可以做Part-Time、做媒人、識靚女空姐賺盤川過日辰。然而像我們這些「過境客」，轉機不外乎3、4個鐘，見工都嚟唔切，莫講話識靚仔空中少爺，除找張長椅攤屍等運到外，還有甚麼搞作？香港國際機場話晒都連續四年獲得「全球最出色機場」排名第一，單是免費Internet周街擺，等你隨時上網接收資訊都已經夠晒方便！
樟宜機場，裏面其實是個擁有7個主題公園的搭客大廈，滯留一星期都行唔晒。向日葵花園、健身室、氧氣吧都算等閒，悶起來更可以參加問答遊戲「What'sYourRange」，答中問題可得現金券即去Shopping，有得玩重順便賺埋盤川㖭！
明年2月，日本中央國際機場打算將日式溫泉與機場合併，可以浸住溫泉，望住伊勢灣景色等轉機，到時，多遇幾次風雪都無問題呀！
遇着班機延誤，第一時間唔好發火或者搵地方瞓覺住，請望望你的旅遊保單，可能可以彌補你心靈上的空虛。
保障範圍：因惡劣天氣、天然災難、恐怖活動、工業行動、騎劫、交通工具技術問題或機械性故障引致的航機延誤。
賠償：每超過六小時之延誤，最高可獲償港幣$250。
（資料由藍十字旅遊保險提供）
移民美國的東歐居民維克托（湯漢斯飾），因為家鄉發生政變，所有身份證明文件一夜失效，國籍不被承認之餘，滯留在甘迺迪機場瞓長櫈。滯留期間認識了不少朋友，同時跟美貌空姐，發生一段感人的機場情緣。
