前日英格蘭聯賽盃不乏大手交易，曼城繼上場聯賽作客砌低水晶宮後，前日再以半場五比○、全場七比一比數大破班士利，買咗「主其他」（八倍半）嘅波友半場已經收錢。可以話，自從傳出領隊奇雲基瑾地位不穩以來，曼城都算將士用命，呢場波對弱隊雖然都收起個別主將，但都贏到幾盡，氣勢似有轉盛迹象噃。
淨係睇其他英超隊，好似伯明翰、查爾頓同埋諾域治對住低組別球隊都係贏一球起、兩球止，惟獨曼城大勝，就證明呢隊波爭勝幾有決心。只可惜曼城禮拜六就要惡鬥阿仙奴，唔知呢股勁重能唔能夠維持落去嘞。講番呢場大勝，值得一提係基瑾到下半場都換入胡禮菲臘斯個細佬B胡禮菲臘斯，話唔定兄弟班一齊落場嘅機會可能愈來愈多喎。
英格蘭聯賽盃旺熱門，同日嘅德國盃就啱啱相反係爆冷溫床，好似甲組紐倫堡、緬恩斯都被較低組別球隊拉下馬；強如拜仁慕尼黑都要靠馬卡爾補時入波反勝業餘球隊奧斯納布呂克三比二。呢場波拜仁強陣出戰都贏得辛苦，對住業餘隊都排強陣，唔通怕贏唔到重要錦標而留定後路？
「戰神」巴迪斯圖達日前出席卡塔爾聯賽一個派對，同幾個一齊掘金嘅過氣名將，好似哥迪奧拿、迪保亞兄弟同拿保夫等一齊上台，好似做騷咁接受訪問。睇巴迪高個樣鬼咁開心，喺彼邦受到貴賓式待遇，怕且都樂不思蜀。返費倫天拿？至少歎多一兩年，再賺多啲大錢再講啦！
好多球迷重記得英國老牌運動品牌「雙稜」，一直係蘇超班霸些路迪球衣贊助商。不過，些路迪經已同美國「一剔」牌簽咗合約，下季將會由佢哋生產全新球衣，五年贊助費高達三億五千萬港元，破球會贊助紀錄。𠵱家「雙稜牌」喺英倫主要贊助得番英格蘭國家隊同車路士，認真悲涼。
摩連奴幾日前未能帶領車路士贏熱刺，賽後就狂轟熱刺消極防守踢法。有波圖舊袍就爆料，話原來摩連奴呢種招數一直喺葡萄牙都有用，每次失分就賴球證，又或者話對手踢法太防守，將壓力推到其他人身上，自己就好似冇錯咁！睇嚟摩連奴今季重有大把賽後偉論要發表。