緋聞情侶陳豪和廖碧兒昨日十指緊扣為時裝店行catwalk，雖然二人堅稱拖手是應大會要求，但時裝店公關表示只要求陳豪和廖碧兒「好開心咁行出嚟」。陳豪和廖碧兒此情不自禁之舉，無疑暴露了二人撲朔迷離的戀情。
陳豪和廖碧兒昨日齊為Bossini銅鑼灣旗艦店任開幕嘉賓，揭幕儀式開始前，整間店均被布幕遮住，而開幕儀式開始時布幕徐徐升起，陳豪和廖碧兒十指緊扣地由店內步出，任由在場記者拍照。
其後兩名兒童版陳豪和廖碧兒隨即行至二人面前，由陳豪拖住兒童版廖碧兒，廖碧兒則拖住兒童版陳豪，兩位小朋友分別錫了陳豪和廖碧兒一啖，司儀即說：「好啦，細路仔錫完，到兩位大人錫啦！」不過陳豪和廖碧兒均裝作聽不到司儀的說話未有理會。
事後廖碧兒接受記者訪問時，透露中秋節要為劇集《妙手仁心III》開工，她說：「一向唔係好重視中秋節，農曆新年就重視，做呢行唔放假好，代表有嘢做嘛！」提到二人為何手拖手出場時，廖碧兒說：「係有關方面要求同安排㗎！我唔怕傳緋聞，只係做嘢啫！」若大會要求二人再做一次可會答應？廖碧兒說：「再做就唔好，都唔係point。」記者再次問廖碧兒是否正與陳豪拍拖，她說：「我哋係好朋友，只係拍劇，唔係拍拖。」
而陳豪則表示覺得運動型的服裝比較適合廖碧兒，問到二人以情侶檔上陣酬勞會否較好時，他說：「OK啦，滿意囉，但係咪高啲就要問公司先知。」記者指兩人手拖手時表現得甜絲絲，陳豪即說：「做嘢啫，大家拍檔。」他又強調與廖碧兒拖手出場是應大會要求，他說：「係大會指定要咁做，咁專業演員要有專業態度嘅，如果要錫就睇情況啦！今次係傳聞後第一次公開一齊做宣傳，有錢點會唔做，我唔覺係因為傳咗緋聞而多嘢做咗。」問到司儀叫二人互吻時可感尷尬，陳豪說：「冇，都係嗰句啦，有錢點會唔賺。」
記者事後問到公關公司發言人黎小姐是否要求陳豪和廖碧兒拖手出場時，她只說：「我哋建議佢哋好開心咁行出嚟。」記者多番追問下，黎小姐始終不肯承認有要求陳豪和廖碧兒拖手，只含糊地說：「你哋唔好亂寫呀，總之我哋建議佢哋好開心咁行出嚟啦。」
記者再致電向陳豪求證時，他說：「之前傾嘅時候有成六、七個人在場喎！好多人。呢啲嘢得啖笑，我只係以事論事。」問陳豪是否有意趁機公開與廖碧兒的戀人關係？陳豪即說：「唔係，只係做嘢啫。」
其實廖碧兒三年前與劉愷威因合作《皆大歡喜》而拍拖，陳豪之前亦有一名圈外女友，不過上月廖碧兒被傳媒發現她到陳豪家中短敍兩小時，事後二人均表示自己現時沒有另一半，對於發展機會以「將來嘅事將來至算」作回應。
採訪：何永寧、戴彩煥
攝影：陳志嵐
