恒基大埔比華利山別墅準備年底賣，當中會有款室內逾萬呎嘅五層高獨立洋房。恒基營業部助理總經理林達民話，呢類巨型獨立屋，唔單止內設私家𨋢，重有個大花園，可以建獨立泳池。
恒基心目中嘅價錢，每呎要五位數字，起碼要一萬蚊呎。
比華利山別墅，首批計劃推出五十幢洋房，嗰間一萬呎巨無霸屋，都會包括在內。林達民話，物業第一期已經準備就緒，等埋第三期嘅售樓紙，預計十二月就可以一齊推出。
樓盤第一期有三百七十二間屋，二期大約一百五十間，首批就會以一期為主。
新界北區已經好耐冇大型新盤推出，林達民覺得，比華利山別墅嘅發售，可以帶動北區豪宅市場，又可以好似賣西灣河嘉亨灣一樣，起帶動大市嘅作用。
大嶼山愉景灣環境優美，重有好嚴格嘅行車限制，除咗屋邨巴士同埋要領牌嘅高爾夫球車外，一般外來車輛，都唔能夠喺屋苑範圍內行駛，不過，亦可以酌情，向發展商申請「專車許可證」。
喺當地設立分行嘅地產代理，為咗方便帶客睇樓，都會申請有關證件，好似啱啱公布業績嘅美聯，佢哋都有申請，重一擲幾十萬，買咗架全新七人車。
會德豐地產宣布，委任韋理信為物業投資董事，早幾日（二十號）已經生效，負責物業投資業務，並向集團執行董事羅大衛滙報。
身為註冊專業測量師嘅韋理信，乃萊坊國際物業顧問合夥人，同時亦係威格斯香港嘅創辦合夥人之一。
另外，佢亦係英國皇家特許測量師學會、香港測量師學會同埋英國仲裁學會會員，喺物業投資市場經驗豐富。
下個禮拜係中秋佳節同國慶日假期，又係商場大搞活動嘅時候。
信和屯門市廣場，十月二號下晝三點，聯同廣州電台金曲金榜，合辦十月份「廣州電台金曲金榜每月主打音樂會」，招待三百位內地旅客。
恒基將軍澳新都城中心商場同馬鞍山新港城中心商場，周末有嫦娥同中國傳統服飾隊伍巡遊。
房委慈雲山中心商場下周二舉行「龍騰鳳舞映月賀中秋」晚會，請嚟歌星表演，現場有花燈會。
另外，新地五個商場，大埔超級城、上水新都廣場、元朗廣場、尖沙嘴新太陽廣場同柴灣新翠商場，搞國慶黃金周購物優惠，其間自由行客購物滿指定金額，可參加抽獎。今日會喺大埔超級城舉行言承旭「Jerryforyou第一次」香港全接觸握手會，搶佔先機。
成日話情比金堅，究竟實際有幾堅？或者可以問吓一位啱啱買咗青衣藍澄灣（圖四）嘅買家。
佢係區內換樓客，適逢結婚周年，想買層樓𠱁老婆，而太太又唔知點解，對藍澄灣情有獨鍾，凌晨時分都要搵個經紀睇樓，點知個業主又企硬個價。
佢哋追價十萬，超晒預算，最終買得成層樓。呢個五座高層E，九百六呎，近二百七萬，幫上手業主賺咗三十八萬，夠唔夠堅？
深井碧堤半島二期，前日有代理武鬥，警方即日已經調查事件，而發展商亦已即日罰咗代理錢。噚日先至輪到地產代理監管局，出番份官方回應，話該局對今次事件表示「極度遺憾」喎。
地監局又話，已經提醒代公司管理高層，要睇實啲員工，確保佢哋依法執業。過去一個月，佢哋已經喺各大新盤，巡查過七十二次，即場發出多次口頭警告同指導函。
地產界好多時都會舉行切燒豬同埋拜神儀式，祈求賣樓順利、生意興隆，而燒臘檔師傅，會即場將燒豬斬件，等大家都可以一嘗口福之慾。由中原地產獨家代理嘅九龍城博林軒（圖六），上個禮拜亦搞咗個切燒豬儀式，當日到場嘅師傅，原來亦係燒臘舖個老闆。佢切完豬，就順道參觀示範單位，睇睇吓，重決定用二百四十六萬，買番間五百九十呎單位投吓資。
電郵地址：
