指同性戀超出討論範圍
張可頤與鄧永鏘妹形影不離

張可頤與早前傳出緋聞的鄧永鏘胞妹鄧霓儀前晚一起出現時裝騷，她直認視對方為閨中密友，有不開心事亦會與她傾訴，但卻不知對方的顯赫背景。鄧霓儀則大讚張可頤是《金枝慾孽》中演得最好的一人。

張可頤與鄧永鏘胞妹鄧霓儀早前在Gucci騷中同車離去，因而傳出緋聞，前晚兩人齊往銅鑼灣利園二期出席DKNY花生騷，張可頤穿上性感吊帶裙，在現場更不避嫌與鄧霓儀咬耳仔聊天。

「係我閨中密友」
問張可頤與鄧霓儀的關係，她說：「我同佢係好朋友，大家又年紀相近，𠵱家講得秘密嘅朋友唔多，我當咗佢係姐姐咁，佢稱得上係我閨中密友，我有乜唔開心嘅事都會同佢講。」問她會否對兩人的同性緋聞感到尷尬？張可頤說：「好無聊，呢啲已經係outofsubjecttodiscuss（超出討論範圍），我之前同馬德鐘食消夜咪又俾人寫。」
問張可頤知否鄧霓儀是來自顯赫家族（已故鄧肇堅爵士的孫女），她則裝作不知反問記者：「乜嘢背景呀？黑社會呀？」

「介紹男仔佢識」
另外，有份演出《金枝慾孽》的黎姿表示自己非無綫合約藝員，恐怕與台慶獎項無緣，可頤對此則說：「應該唔關事，公司唔會因為你唔係自己人而唔畀獎你，我舊年憑《九五至尊》攞獎，我都唔係合約藝員啦。」
而鄧霓儀對與張可頤傳緋聞亦表示感到無辜，她說：「我諗我要考慮介紹吓啲男仔畀佢識啦。」她並表示有追看張可頤有份演出的《金枝慾孽》，並大讚她是眾女角中演得最好的一個。
而蒙嘉慧被問到陳芷菁自稱拍劇時被男演員博懵，她說：「我就冇遇過呢啲情形，我真係要檢討吓自己，通常拍親熱戲啲男演員重緊張過我哋啦。」
採訪:梁錦雯　攝影:陳志嵐