Britney、Kevin洞房翻雲覆雨48小時

美國女歌手BritneySpears上星期六同男友KevinFederline喺加州秘密結婚，佢兩個出席完結婚派對之後，即刻到酒店馬拉松式瘋狂做愛四十八小時，重吩咐啲保鑣除咗天跌落嚟之外，都唔好騷擾佢哋。
呢對新人上星期六去完喺夜店搞嘅結婚派對後，就到咗洛杉磯一間酒店過二人世界。聽聞Britney一早就book定間總統套房同Kevin過洞房之夜。雖然Britney已經係今年第二次洞房，但佢同Kevin翻雲覆雨足足搞咗四十八個鐘。本來美國傳統婚禮，一對新人要喺第二朝同父母食早餐，但係Kevin兩公婆梗係冇啦。有位保安人員爆料話：「Britney下令叫我哋除咗天跌落嚟之外，都唔可以騷擾佢，佢喺電話把聲重顯得好狂野㖭！」

發假帖掩人耳目
此外，有傳Britney原本想搵Kevin個肥妹囡囡Kori做花女，可惜Kori阿媽SharJackson因怕個女成日曝光而容易成綁架目標，所以唔畀個女做花女。而Britney為咗掩人耳目，曾寄咗唔少假請帖，話下個月十六號先舉行婚禮。我羅拉重聽聞Britney阿媽亦成功說服個女喺結婚之前同Kevin簽咗婚前協議書。而ChristinaAguilera亦乘機踩Britney嘅婚禮滑稽、低俗兼寒酸。