未到十一黃金周，零售股就已經炒到㷫烚烚，好似寶光實業（084）升19.19%，收0.59元，名店Joyce（647）亦升11.25%，收0.445元。經紀黃噚日推介的莎莎國際（178）表現亦唔差，升8.63%，收3.775元，又創新高。
講到零售股，經紀黃話又要提一提持有崇光百貨的利福國際（1212），一來係炒黃金周概念，二來利福喺上海的久光百貨將於下周正式開幕，據聞已廣邀各路英雄到上海一遊，係時候要留意，睇吓會否借勢炒番轉。
利福早排曾經熱炒過，股價最高曾見12.50元，最近在11元水平徘徊，噚日升2.2%，收11.55元，成交金額1486萬元。
經紀黃話，上海久光位處旺區，走嘅係高檔日式百貨路線，裝修陳設一定靚，至於上海市民接唔接受咁高檔嘅消費就未知，但估計新開張會有一番熱鬧。
另外，停牌兩日的銀建國際（171）傳聞將於今日公布以8億銀向阿媽收購不良資產，然後跟住復牌，雖然隻股停牌前已經升咗唔少，但聽講今早會繼續放煙花，再炒多一轉。
慕容小初