無驚無險，恒指又升83點。國企指數微跌，恒指跑番快啲，輪流接力，大市有排玩。又係嗰句，有平貨要買。
平保C輪：國內「三保」（保險個「保」），人保（2328）與國壽（2628）分別有進帳3格同兩格，平保（2318）則「企硬」，平收11.75元。任何股票就算點好，升升吓都要唞氣，平保唞緊氣，遲吓再嚟過，趁有機會，收集C輪。對象有兩件，2288與2233是也。
2288明年7月到期，夠晒長命，輪價20.5仙，溢價6.8%，槓桿率5.7倍（有效4.1倍），引伸波幅32%。2233明年2月到期，輪價1.68元，溢價3.7%，槓桿率7倍（有效5.3倍），引伸波幅32%。論爆炸力，2233大啲。
地產股C輪：地產股有番勢，4大地產股除咗恒地（012）微跌1格之外，全部都升。愈係接近下月12日兩幅勾出政府地皮拍賣之期，估計地產股愈係硬淨，地產股C輪要昅實。長實C輪正印係昨日推介嘅2249，收73仙，只係進帳1格，唔啱數，升得唔夠，更加抵買。新地C輪主角係9738，昨收57仙，升10%，稍嫌升得急少少，吼回回哋之時上車。恒地C輪揀9038，收41.5仙，升2%，現價諗得過。
和黃C輪：和黃（013）收62.75元，向上爬1格，今日除息51仙，估計除息之後好好睇睇，兩隻C輪諗得過，佢哋係2157同9132，分別收74仙同85仙，冇乜變化，溢價唔高，槓桿率唔細，爆炸力唔弱。
章盛