周星馳雖然拍嘅喜劇有唔少fans支持，但佢同啲導演嘅合作似乎就唔多融洽，好似王晶、李力持、洪金寶同杜琪峰咁，同佢合作完後，都對佢好有意見，幾乎最後都係反面收場，早排王晶喺內地接受記者訪問時，又忍唔住同記者暗寸星爺，佢話呢一代笑匠好少笑，但收錢嘅時候就識笑，似在暗寸星爺見錢開眼，佢又話有人喺影棚係一個暴君，鍾意喺現場重拍又重拍。
星爺事後俾人問番對呢件事睇法，佢話唔多認同王晶嘅說話，佢承認自己喺王晶面前係好少笑，但唔代表佢平時唔笑。
星爺話：「我唔知王晶導演原來會認為自己咁了解我，不過我認為大家唔好相信佢，因為佢其實唔係真係咁了解我。」馮仁昭好老實講句，喺呢個影壇的確係有好多同星爺合作過嘅導演對佢好有意見，似乎星爺同人相處嘅技巧，真係要檢討吓！
容祖兒嘅祖母林慧貞俾人話借錢唔還，對方嘅家人好想討回公道，祖兒噚日喺商台被問到呢件事時，佢話：「算啦，如果佢唔係我嫲嫲就冇咁多人問，呢啲只係芝麻綠豆師奶啫。我相信佢唔會咁做，佢平時鍾意幫人出頭，係抱打不平嘅人。」
古巨基噚日去商台時，將自己包到實一實，戴帽又戴黑超，原來佢俾蚊針親眼蓋，不過基仔仍好輕佻話，弟婦就快生BB，自己諗住搵倪震幫BB改名。至於佢俾細佬爬頭結婚重生埋仔，基仔話：「雖然我好鍾意BB，但事業為重唔急得，冇機會搵伴侶，因為我想搵個圈外人拍拖。」
徐子淇昨日出席西九龍中心舉行的時裝騷，今年中秋節徐子淇會留港與家人共度，她說：「我去讀書三年，無喺香港過中秋，我最鍾意就係中秋節。」問子淇可希望與男友一齊過中秋人月兩團圓？她甜絲絲咁話：「唔好講佢啦！到時我會同朋友食飯。」
張曼玉（Maggie）前日四十歲生日，佢嘅外籍男友GuillaumeBrochard專登嚟咗陪「壽星女」過生日，為咗避開傳媒耳目，Maggie先搵人開車使出調虎離山計，然後就同男友，以及梁家輝等人去灣仔食火鍋，食到十一點幾由梁家輝送佢哋返屋企。
今年嘅亞太影展喺日本福崗舉行，港片有《大隻佬》、《無間道II》同《旺角黑夜》三部戲入圍角逐，但三部戲都冇派演員或導演出席影展，最搞笑係香港製片家協會主席洪祖星亦都人影唔見。不過台灣方面就派出咗二十四人嘅代表團出席，而佢哋就有《十七歲的天空》、《黑狗來了》同《台北二一》三部戲入圍角逐。
許志安第二次成為「平等機會委員會」嘅宣傳大使，噚日喺港台時講起佢同葉德嫻再度合唱新歌《美中不足》，安仔好有信心呢首歌會成為代表作，重話想送份禮物畀葉德嫻。不過當安仔聽到葉德嫻鍾意一支價值百幾萬嘅望遠鏡時，安仔就話唔會送咁貴嘅嘢，佢話：「我從來未送過百幾萬嘅嘢畀人，百幾蚊我就送十支畀佢。」
