立法會今日為候任議員編座位。唔少保皇黨都驚咗長毛，或者怕咗佢陣「除」，唔敢坐佢隔籬，咁即是公然歧視長毛及長毛代表嘅草根市民！大班同八方講：「有啲富貴黨嘅議員就嚟問我，長毛有冇生虱乸！」
大班冇透露邊個咁講，但八方都好驚訝有啲議員咁冇教養、狗眼看人低，對於佢哋，隔籬嗰個若然係胡錦濤，一定爭住坐埋去，唔知平機會係咪應該主動調查？
至於大班自己就想同寶Baby以及馬丁坐，因為Baby成日早退，大班話會多啲空位喎。而過去偏於一隅嘅民主黨已經講到出口想同自由黨調位。
大班噚日請班行家食鏞記燒鵝（圖）。唔知係咪觸鵝生情，大班話，佢七十年代喺加拿大，當時加國政府嫌食肆就咁掛起燒臘唔合衞生要取締，當時佢就搞咗個「全國爭取燒臘權益委員會」，最後終於成功迫政府讓步。
大班又話，如果唔係當年做龍門陣，佢可能已經做咗政協。九三年國慶，佢曾經參加過政協及知名人士訪京團，當時嘅統戰部長王兆國重坐喺佢隔籬，一齊聽李鵬演講，可惜王兆國今日已經反咗艇，大班就當旺，真令人欷歔咯。
傳真︰2623-9278
電郵︰