港股前日象徵式回軟3點後，噚日升勢再起，又創出今個升浪新高，恒指收市13304，升83點，升降指數連續第4日呈強。大市升浪再起，短線可見13500，中線較樂觀的看法，係衝破今年3月初的14058高位阻力，向複式頭肩底的量度上升目標15000點關口推進。
國企大升後，出現獲利回吐，國指曾一度下跌86點，但低位又見有大盤不斷收集，結果又買番上去，國指收市4670，僅微跌13點。
國企升勢現時僅係剛剛起步，大戶同基金收集咗幾個月，今次「踢」上去，點會咁快收手？睇噚日個勢，佢哋食埋啲獲利貨之後，下一轉升勢會重急。
石化股唞氣，但正係低吸良機，就以北京燕化（325）為例，04年度（12月結）保守估計每股盈利0.58港元，唔好話多，就8倍PE計，股價已可見4.6元。另外，龍頭大哥中石油（857），好淡雙方連續兩日都鬥得好激烈，淡友雖然倒水咁沽，但好友手瓜亦好硬，暫時仍係以好友略佔上風。事實上，若國指向5000點進發，中石油點會蟄伏？
油價見底回升，近日又重上46美元水平，大行多看好油股前景，中油（香港）（135）「晒士」較細，噚日大行買盤一到，就立即破位而上，高收1.15元，成交且去到6366萬股，比前日大增5.2倍，係今年1月6日以來的最高紀錄，當時股價係歷史新高的1.4元。
由今年3月開始，中油走勢成個大圓底，噚日一支大陽燭升破頸線阻力，今日再升，保歷加通道亦會「撐」開，升勢將會更急，以量度升幅計，股價好大機會上番1.4元。油價高企，中油獲利大增，股價遲早會反映。
04年度（12月結）的上半年，中油獲利4.32億元，升38%，每股盈利9.11仙。以中油現時每年產量1200萬桶計算，油價每上升1美元，集團淨利潤可增加7000萬元。若今年平均油價比去年上升6美元（亦只係30美元），中油盈利已可增逾4億元。
保守估計中油04年全年盈利11億元，每股盈利22仙，以8倍PE計，股價已可企於1.7元之上。
郭兆誠