中國籃球明星姚明向來講嘢充滿幽默感，又字字珠璣，佢喺呢嗰月底即將出版嘅美國《時代周刊》有篇訪問，就完全顯露呢位NBA球星嘅對答得體。好似當中記者問姚明有冇想過成為美國公民，姚明就先搞笑咁答：「至少𠵱家唔想，因為恐怖襲擊關係，我諗𠵱家做中國公民應該會安全啲。」死未！真係話中有刺㗎，如果問問題嘅記者係美國人，真係自討沒趣。
不過開完玩笑之後，呢位中國巨人又一本正經咁講：「我仍然覺得自己係一個受着傳統中國文化嘅人，中國係我嘅祖家。」呢兩句說話已經講到明啦。
我求大俠除咗佩服姚明喺籃球壇嘅成就之外，最重要係呢位後生仔係食腦之人，唔係剩喺得個身材高大；佢面對傳媒嘅對答永遠大方得體，充滿智慧，斷唔會丟我哋中國人嘅架！
除咗李奧費迪南，因腳踭受傷而休息咗三個月嘅蘇甘保亦喺前日復出，重幫阿仙奴喺場預備組賽事贏高雲地利四比○㖭。雖則英格蘭下月九號喺世盃外圍賽主場對威爾斯，將會冇咗腳趾受傷嘅中場謝拉特，但𠵱家有對正選中堅齊齊復出，咁樣佢哋領隊艾歷臣亦可以鬆一口氣。
迪肯尼奧日前又再語不驚人死不休，話恨為拉素入波恨到發燒，入波感覺好似同佢性幻想對象狄美摩亞上床咁正喎。記得迪肯尼奧講過退休後會拍部關於自己嘅電影，唔知會唔會加插《人鬼情未了》經典一幕。佢果然係上一代球員，連性幻想對象都屬上一代……。
英國《大陽報》風格向來嘩眾取寵，將英格蘭球員睇到天咁大。近日皇馬教練金馬曹辭職，該報竟然講到係因為佢用奧雲打正選，激嬲冇得踢嘅隊長魯爾，夾埋隊友輸波！話晒魯爾踢咗咁耐，身兼球會同國家隊隊長，竟為私念去教隊友輸波，想畀隊友鄙視乎？真係噏得就噏。
網球靚女舒拉寶娃近日得到一間香水公司垂青，搵佢做代言人，兼且會推出以佢嗰名為名嘅香水品牌；據聞佢張三年合約可以剩袋三千九百萬港元。舒拉寶娃唔似佢個俄羅斯同胞古妮高娃咁剩係得個樣，佢有姿勢有實際，可以預見呢位小妹嚟緊重有大把贊助商爭住簽佢。