三大惡人入立法會，未曾坐低，經已密密做嘢。長毛先聲奪人，在維園論壇面對維園阿伯嘅組織性暴力威脅奮勇還擊，舌戰縱容土共惡勢力嘅警方，成功迫令警方將一名土伯帶回警署，並以「唔准粗口侮辱我阿媽」一句，挺身捍衞全港母親嘅人權，真係人心大快！
比起民主派一班書生學者，長期受維園土伯謾罵羞辱，個個忍氣吞聲，長毛嘅自衞反擊行動，一掃民主派頹風！維園愛國土伯氣燄瘋狂，不但粗言穢語，吓吓辱及先人，警方長期助長邪風，長毛一出，匪徒竟然爆響口話要斬人。長毛維護法治，未入立法會先建一功。
至於詹培忠，佢本來就醞釀搞「四五行動」，拉夠四五個人成為獨立力量。今屆立法會，肥詹棟支旗出嚟，石禮謙、劉秀成、呂明華、何鍾泰加埋陳智思，並稱「六壯士」，本來夠勢力有凸，點知特區政府先下手為強，將石劉呂何五人拉晒出嚟，組成新早餐保皇黨，孤立潮州怒漢！
以怒漢嘅性格，梗係唔會向打壓屈服。老實講句，肥詹行頭成立六壯士集團，組成獨立勢力，石禮謙等五人，就成為具有獨立人格嘅知識分子型聯盟，可以貫徹「理性愛國，曲線救港」嘅第三條路，既唔埋民主派堆，又唔歸親中保皇類，其他五人，當堂份量大增，喺新聞記者面前亦風頭不輸於長毛。𠵱家嗰五個位都未坐定就先受阿董招安，做埋邊緣保皇黨分子，第日就算排隊上京受賞，人哋阿爺都會優先睇田北俊、馬力、蔡素玉等正統親中人士台戲，乜嘢「新早餐派」，去到人民大會堂，人頭湧湧，中央領導人用望遠鏡都未望得到你，咁你啲「早餐」，本來同肥詹一齊，就有魚翅食，黐落阿董處，不過係白粥油炸鬼，踎大牌檔嗰隻，又有乜價值呢？
阿董想剝肥詹光豬，以為搶咗五票過去，怒漢就冇符，但怒漢出名唔係人咁品，一詹當頭，萬夫莫開，論隻抽，喺立法會都冇官員夠佢嘴。人哋一復出上場，呢個政府就對人咁冇禮貌，第日實係慘嘅！
至於大班，選後陪同一班達官貴人暢遊九寨溝，並在山明水秀嘅祖國景點開咗幾場腦震盪會議，成個毛主席向地方領導人發出指示咁嘅款，回鄉證當然無恙，因為唔好以為大班多錢，佢同長毛一樣，自細亦崇拜毛澤東，所以佢關懷弱勢族群。呢一樣同當今嘅胡溫，查實亦夾晒嘴形。三大惡人經已堆定沙包，機關槍上定彈藥嘞，今屆立法會好睇咯。
傳真︰2623-9278
電郵︰