容祖兒嘅嫲嫲林慧貞係葵興邨業主立案法團嘅主席，較早前已俾居民投訴帳目唔清，噚日馮仁昭又收到一名謝小姐投訴，佢指林慧貞多年前做會問佢媽咪借咗兩萬幾蚊，結果只還咗一半，重爭萬幾未還，後來佢媽咪肺癌死咗，𠵱家追討無門。
謝小姐噚日喺電話中講：「當年我媽咪同林慧貞都係『會頭』，但佢供供吓就唔供，爭人兩萬幾蚊，於是問我媽咪借錢，佢答應每個月供番份會當還債，結果爭萬幾蚊時就冇再供落去，八七年我媽咪肺癌過咗身，去佢屋企要佢還錢，佢堅持唔還，後嚟重搬走。我睇到報紙不值佢嘅行為咪講出嚟，等人唔好信佢。」
林慧貞噚日喺電話否認：「我從來都唔主張人做會，自己亦都唔識，指控我嘅人有證據即管拎出嚟，係事實我可以同佢對質，否則我保留追究權利。」
此外，Joey早前拍新歌《SOS》嘅MV，着咗紅色露腰裝喺圓柱同沙發上擺出誘人甫士，一時摸胸、一時拗腰。而Joey有份演出嘅電影《身驕肉貴》就嚟上畫，佢喺戲裏會飾演寵物店老闆，會同做燒烤場老闆嘅劉青雲有感情戲。
陳鍵鋒近來認真當黑，一連撞兩次車，搞到拍劇成日要用替身，真係幾煩。噚日佢返將軍澳電視廣播城開工拍《肝膽崑崙》，見佢頭岳岳，問佢好番幾多，佢話：「醫生話我條頸嘅裂痕細咗，𠵱家都郁得順啲，之前就幾麻煩，唔可以大動作，所以好多動作鏡頭都要用替身，用得多自己都覺得唔好意思。」
古巨基早前同四名奧比斯大使中學生返內地做親善訪問，探訪接受眼科飛行醫院治療嘅居民。呢四位來自基仔母校（沙田聖公會林裘謀中學）嘅學生，噚日同基仔一齊返學校分享心得。問到陳慧琳（Kelly）早前出騷時被指咪嘴，當時在場嘅基仔就力撐話：「我跟住佢出場，就唔覺嘞。」佢重話大歌手應該盡力唱，唔應該欺場。
張學友噚日到港台接受訪問，講到湊女經驗，學友就坦言𠵱家已經開始擔心個女將來拍拖，佢重踢爆林珊珊表面上扮開明，但實際上曾經跟蹤個女識男仔㖭，不過學友就話相信自己第時都會咁做，至於怕唔怕個女知道佢跟蹤會反感，學友就話：「最多行遠啲囉，佢會知我係出於關心。」
