立法會選舉雖然多多不如意事，但係要推翻選舉結果，真係談何容易，台灣連宋配鬧到聲淚俱下，阿扁照樣做佢嘅總統，民主派今次錯失了一至兩個直選席位，卻無端端多了兩個功能議席，算是有得有失。不過經此一役，有人話，民主黨同四十五條關注組有排修補關係。
立法會下個月六日先至正式開鑼，煲呔見有少少空隙位，第一時間又攞假唞唞，好似話下周國慶前先返嚟。其實煲呔應該好唔得閒先啱，佢就○七、○八年嘅選舉安排作鳥籠諮詢呢個月底就結束，睇怕唔會再延期啦，各路人馬如果有意見就趁手，否則班老左又佔晒優勢。
八方有位老友有感於比例代表制反映唔到民意，都寫咗多啲意見畀煲呔，叫佢考慮用其他方法嚟計議席，等大家條氣順啲，因為泛民主派有成六成二選民嘅支持，喺議會卻只有二十五席，唔係好對路。煲呔做事認真，點都會回封簽名多謝信，都值得留念嘅。
傳真︰2623-9278
電郵︰