國企股噚日繼續獨領風騷，就連藍籌股都要企埋一邊。經紀黃話，好多國企股升幅甚勁，已經過晒證券行的目標價，睇嚟都係時候收割獲利。
零售股龍頭之一的莎莎國際（178），股價雖然高企，PE近30倍，但由於臨近國慶及十一黃金周，正是炒零售股之時，所以仍然深受投資者追捧，而噚日亦有歐資行出報告推介莎莎。
莎莎的對手卓悅（653）上周公布今年6月止中期業績，盈利比舊年同期勁升53.27%，有2540.6萬元，某程度上反映呢行易搵錢，而莎莎無論規模或管理上都比卓悅為佳，所以卓悅掂嘅話，莎莎應該更掂。
雖然近期地產市道回升，莎莎舖租支出亦相應增加，但因為自由行人數愈嚟愈多，十一黃金周之後，又有聖誕同新年，點計零售股都應該受惠。
莎莎早排股價曾經見過3.70元高位，噚日升2.2%，收3.475元，股價雖然唔算平，但炒風一到，估計會再起航。
慕容小初