爆機狂迷：
《EyeToy跟猴子玩吧！》手舞足蹈捉馬騮

大富翁式嘅遊戲相信大家都玩過唔少，即使間中有新作推出，其實玩法都跳不出框框，不過只要加入新元素，遊戲又會得到重生機會，今日試玩《EyeToy跟猴子玩吧！～手舞足踏鬧翻天!!》，對應PS2大熱配件EyeToy，唔使再拎住手掣，手舞足蹈就可以玩個痛快，而且最多可支援4人同時對戰，配合30多種不同類型嘅迷你遊戲，加上全面中文化，最啱一家大細玩，當作做運動都唔錯！

記者：許福合　
攝影：陳盛臣
ImageGirl：Fion

遊戲資料
主機：PS2
開發：SCEI
類型：智力
售價：$308（連EyeToy鏡頭$415）
(c)SonyComputerEntertainmentInc.
SONYHK
查詢電話：23452966

唔少PS2FANS都會知道EyeToy玩法，只要喺鏡頭前，按指示接觸畫面上圖像就能代替手掣操作，喺今集《EyeToy跟猴子玩吧！》，玩家基本操作方法都好簡單，當選擇以故事方式進行遊戲時，用「手」拍打右下角「輪盤」，再轉動輪盤決定步數，其實玩法同一般大富翁式遊戲差唔多，只係用EyeToy作為操控方式。雖然操作相似，不過亦有點技巧，使用輪盤前，最好先透過地圖，看看前路哪一個落腳點較好，再決定好「步數」，喺使用輪盤時好好控制「力度」，只要熟練後，想要幾點就幾點都唔係難事，千祈唔好單靠運氣，否則只會經常掉入死亡陷阱，要趕上對手，尤其係電腦就非常困難。

終極目標：捉猴
大富翁會以金錢決定玩家實力，今次新作就會以猴子數量代替，愈多猴子才能往下一關進發，地圖上設有商店，當踏上後就能盡情購物，而代價就係猴子！商店內貨物種類都有唔少，玩家可買香蕉皮擲對手，亦可用炸彈攻擊玩家，另外亦有防禦性質「狗笛」，可阻止惡犬咬人，成功攻擊後，可從對手身上取得指定數量猴子，一加一減，差距好大，定要多多利用啊！除咗攻擊對手獲得猴子外，亦有落點會增加猴子數量，相反，亦會有扣減嘅地點，另外亦設有分岔路、捷徑等令人快速前進或後退嘅地點，若能好好掌握輪盤使用，必定可大大提高勝算。

迷你遊戲：4人參戰
有玩過同類遊戲玩家，因為輪住行，總逃不過一個「等」字，喺《EyeToy跟猴子玩吧！》雖然都係4人輪住移動，但仍有唔少互動之處，如在版圖某一格巧遇對手，立即會進入迷你遊戲嘅戰鬥狀態，間中還會強制邀請其他不相干玩家加入，絕對唔會有無聊嘅等待嘅時間！勝出一方就可以從其他3個玩家身上獲得猴子，可大大增加勝算。迷你遊戲嘅種類非常多，總數有超過30種，較好玩嘅有擦掉嗶波猴抹在地板上腳印、賽跑、跳高、跳遠、打棒球、踢足球又或小賽車，當中同樣既講求鬥智，又要鬥反應，事關你再唔係用手掣，而係玩緊EyeToy，誰眼明手快就可勝出！每個遊戲開始之前都會有遊戲說明，好彩今集已全面中文化，玩家就唔使估估吓咁玩。