上星期四本欄講「蘋果明益蔡素玉」，其中問「譚香文係邊個」？何秀蘭失議席有啲可惜，但有人上綱上線，要李柱銘辭職，實在匪夷所思，實屬衝動派掌門人。我哋好多港島選民老友，因《蘋果》標題而集體轉軚，不投余何，改投楊李，事後覺得好失望、好可惜，唉聲嘆氣，但正如律師黃對左丁山講：「民主派擁躉，崇尚自由選擇，唔慣俾指揮棒指揮嘅，錯咗就錯咗啦，冇得好講，我哋心目中，保李柱銘緊要過保何秀蘭好多，李柱銘一聲告急，我哋梗係要保送佢入立法會。」
一位長者級讀者，署名「何姨」來函話：「譚香文小姐真是令大家跌眼鏡，其實佢係無黨派獨立區議員，在鑽石山龍蟠苑有辦事處。佢好好人，李華明去到龍蟠苑，佢一定出嚟幫手嗌咪，造勢大會都有到場打氣。重叫我老太婆支持佢，好客氣，今次真係名不見經傳，一鳴驚人。（你問邊個？問我囉。）
何秀蘭我一早預佢輸嘅，我在港島派足幾十日傳單，從未見過佢哋條隊，而且民調話佢哋佔40%，咁剩低60%五條隊分，其實人人都要告急啦，個個都驚，吸票機幾得人驚，左生，『殺君馬者道旁兒』，唔關《蘋果》同馬丁事嘅，『瑞士卷』黨有鐵票。其他，我唔講嘞！」
何姨不知何許人也，臨尾整一句「殺君馬者道旁兒」，搞到左丁山要上網查個究竟，結果無功而還，只知道此語出自東漢嘅《白虎通》，近代人，最偉大校長蔡元培在一九一九年五四示威之後，辭去北大校長職，到杭州小休，臨行前在報紙登一段啟事，內有「殺君馬者道旁兒，民亦勞止，迄可小休」，至於如何釋義，左丁山重未敢肯定，要繼續查證，惟有嘆一句書到用時方恨少。