在香港飲食業確係難做，本來應該係良性競爭地鬥好味道、鬥好服務、鬥好坐，一律變成鬥平、鬥大件、鬥長命，總之59蚊任食，食到你暈，撐到你飽，食你唔死下次嚟過。一切表面功夫做到盡，又平又大件之餘，口味亦是強鹹死甜勁辣，乜都cutcost，惟有將貨就價，來料唔多靚，惟有先炸一炸，再撈甚麼麻辣勁蒜，舌頭都早已麻木了，管它是甚麼，麻辣木頭也照啃。清清淡淡的菜式最考功夫材料，細意咀嚼才啖出真滋味，但這是一個濃油大醬的年代，誰有功夫來細嚐，只要夠香口、有賣相，囫圇吞下所有，拍拍肚皮離場。
在香港當編劇也不容易，身邊周遭發生的一切已像是幻海奇情，材料已經很豐富，傳媒們各施巧手濃油大醬烹之，天天新款之餘，頭條亦香口得很，吃慣了口味濃郁的麻辣火鍋，清清淡淡的菜式難怪乏人問津，沒有對與錯，這是一個現象。「小事當大事，大事當冇事」也是香港一個有趣現象。不過其實並不有趣，但現象就是現象，驅之不散，趕之不去，惟有說有趣，迷惑一下自己，與其共存。
收音機的新聞報道讀出：「昨日在公共泳池內發現七條活紅蟲、五條紅蟲屍體、三個蟲蛹、四塊蛹皮，在公廁內更發現四隻死蚊㖭。」在外地回港度假的友人聽罷，忙不迭豎起手指公說道：「咁大個公廁死咗四隻蚊都有得報新聞，香港嘅衞生水平勁!!」