無綫最近同民建聯主席兼立法會新丁馬力做咗個專訪，鏡頭前嘅馬力真係好勤力，喺廣州接受結腸癌化療時，瞓喺床上重不忘睇英文書。其實八方初時重以為馬力梗係睇緊《三個代表》之類嘅文件，緊跟中央路線，不過睇真啲先至發現馬力原來刨緊外國暢銷小說《達芬奇密碼》。
八方覺得奇怪，身在廣州嘅馬力，寧願睇英文小說，都唔睇中文書，唔通諗住刨好啲英文，返到香港立法會開會時，俾英文傳媒訪問都可以流利啲回應？
專訪裏面，馬力重引述民主黨李柱銘成日取笑民建聯英文縮寫DAB，係「DemocracyAccordingtoBeijing（民主由北京話事）」，原來馬力好唔忿氣，心中一直有一句話想反駁馬丁，不過一直冇當面講過，就係笑番民主黨嘅縮寫DP，應該解為「DemolishingParty（破壞黨）」喎。
馬力份人一向都寸，對李柱銘卻忍到今日先至爆出嚟，真係辛苦，呢個肯定對健康冇好處，馬力將來喺議事堂過招，唔好谷谷埋埋喇，咁客氣好蝕底㗎。
傳真︰2623-9278
電郵︰