每年十月都會有唔少新日劇出籠，而為咗挽救愈來愈差嘅收視，日本各大電視台紛紛落重本製作日劇，希望吸引多啲觀眾收睇，我羅拉就睇好其中幾套嘞。
第一套就係織田裕二相隔十三年再為富士電視台「月九」時段演出嘅《LASTCHRISTMAS》，織田飾演一名運動用品公司打工仔，佢結識咗由矢田亞希子飾演嘅同公司秘書，兩人當然發展咗段愛情故事。而喺第一集入面有一幕講織田諗番佢讀大學時嘅往事。三十六歲嘅織田要扮番二十一歲嘅仔，咪話唔考工夫。
另外，水着女星岩佐真悠子第一次拍日劇就擔正做女主角，佢主演嘅新劇《DeepLove》改編自日本同名話題小說，講述不斷援助交際嘅高中生遇上患有心臟病嘅少年後，尋回真愛，本身係高中生嘅岩佐重話好有共鳴㖭！
而另一套就係由剛為人父嘅反町隆史孭重飛嘅《熱血男子２》，第一輯喺上年播出時因為口碑同收視都唔錯，所以今年決定添食。不過新一輯女主角就由伊東美咲代替矢田亞希子。伊東會喺劇入面做反町嘅細妹，為反町帶來唔少麻煩。
最後係米倉涼子嗰套《黑革之手帖》，佢喺入面破格演出一名銀座媽媽生，就會同飾演舞小姐嘅釋由美子一齊打江山。