雖然下星期才是中秋節，但行過公園，已見不少朋友開始玩燈籠和蠟燭。今年的燈籠潮流，依然是大熱吹氣燈籠，不過主角已由數碼暴龍、比卡超換上《機動戰士特種計劃》、《百獸王》等。再加埋長出長有，手工依舊精細的傳統燈籠，以及更多新Function的螢光棒等，無論大小朋友都一定啱玩。
記者：張穎麟
攝影：陳智良、林栢鈞
Model：Samantha
雖然吹氣燈籠夠多樣化，但還是傳統紙製燈籠最有中秋氣氛。兔仔、楊桃、金魚絕對不能缺少，不過為了更耐用，令外形更美觀，布製燈籠漸受歡迎，推出的款式更吸引呢！
論最經典的傳統燈籠非兔仔燈籠莫屬，整隻兔由紅、黃、綠、白四色紙製成，雖然無四隻腳仔彈彈吓，但可以拖住佢周街行，確令人回味無窮。
售價：$55(c)
呢款布製蝴蝶燈籠，雖然無兔仔燈籠咁經典，不過論手工卻更勝一籌，因為佢除了刺繡技術到家外，粉黃、粉綠的顏色更運用獨到，一雙以彈弓製成的觸角，蹦蹦跳般可謂活靈活現。
售價：$39(c)
以往的楊桃燈籠都以玻璃紙做成，容易刮爛、燒着，轉眼間化為烏有。所以𠵱家唔少楊桃都換上布料，耐用之餘，手工亦更精細，楊桃頭上又有三個細楊桃，可見師傅手工精巧。
售價：$45(c)
布燈籠唔單止耐用，加上布的彈性較紙大，款式變化亦可多一點。以金魚燈籠為例，呢條布金魚，由上而下全由布包裹，夠晒全面，唔似紙金魚燈籠，圖案只集中在左右兩側。
售價：$38(c)
無可否認唔少燈籠都只係一年玩一次，太昂貴的話的確有點奢侈兼浪費。這款傳統的風琴式燈籠價錢夠晒實惠，而且款式更是力久不衰，每年必有人捧場，玩完後摺起，明年又可再玩過，慳錢又環保。
售價：$2.5(c)
新一代燈籠多以卡通外形作賣點，明顯要討小孩子歡心。若要點綴家居，呢款以「慶賀中秋」字樣為主題的燈籠，便極具氣氛。多切角面的設計，折射度較佳，除了透明款外，亦有白色款選擇。
售價：$15(c)
唔少傳統燈籠都係色彩斑斕，圖案多多，夠晒誇張。想簡約一點，不妨選擇呢個由紅、橙、黃、綠四色組成的燈籠，還帶點日式味道，又可摺起。
售價：$25(d)
這款楊桃燈籠外貌有點似飛船，夠晒特別。整個燈籠用上玻璃紙製成，內裏的鐵線若隱若現，一派粗糙原始味道，夠Raw又令人懷念。
售價：$38(d)
外形維肖維妙
唔怕燒可說是吹氣燈籠的最大優點，不過部份的造型往往過於呆板，一碌柱咁印上公仔就算，今年啲吹氣燈籠，為了令形狀更接近原著，部份將燈籠分成兩個吹氣部份，手手腳腳Detail得多，外形更靚、更維肖維妙。
兒時玩的飛機燈籠都比較簡陋，想不到今天的小朋友會這麼幸福，可擁有《機動戰士特種計劃》中穆所駕駛的空中霸王。機翼、機關槍口的比例都掌握得非常好，如果有埋自由同禁斷高達就更好玩。
售價：$34(a)
小時候玩的紙紮火車燈籠，到今時今日已變成吹氣款式，呢款新幹線火車頭，外形夠可愛，唔單止送埋直升機夠得意，而且車輪同車身部份分開入氣，外觀更加實在。
售價：$34.9(e)
香港與日本大熱的《機動戰士特種計劃》，作為女主角拉克絲最愛的Haro，今個中秋節，當然要化身成吹氣燈籠登場。1:1原大比例，值得欣賞係Haro雙手擺出伸展姿態，中秋過後，亦可當玩具玩。
售價：$34(a)
由遊戲機跳到動畫的《網絡英雄洛克人》，今年更入侵燈籠界。為了同邪惡的WWW組織對抗，洛克人換上能源彈準備出擊。手工方面，肩膊上的盔甲及洛克人的頭髮都做埋，一點也不馬虎。
售價：$39.9(e)
平時見BonBonn都只是在巴士上，今次終於可以近距離接觸呢隻咪眼小馬騮，不要以為BonBonn線條簡單，唔夠精巧。其實佢連PatPat位置的粉紅色特徵都做埋，論細緻絕對贏晒。
售價：$22(a)
每年中秋都例必登場的多啦A夢，今次以可愛表情為賣點，大眼大口笑得開心，小朋友實鍾意。美中不足係頭身比例有點怪，欠缺原作中多啦A夢頭大身細的得意之處。
售價：$20(b)
萬人迷HelloKitty經常以不同造型出現，今次佢以中國服飾迎接中秋。Kitty的手與頭均綴以小菊，造型更加可愛。不得不提係小菊上貼有金粉，中秋夜見到，一定更加搶眼。
售價：$34.9(e)
除了《機動戰士特種計劃》外，《百獸王》亦係男孩子最愛之一。雖然未有金剛合體同銀狼合體登場，單係獅王合體變成燈籠出場已夠號召力。最抵讚係胸口的紅獅王都做到凸出效果，特別有霸氣。
售價：$39.9(e)
嫌燈籠太大個的話，還有各款螢光棒可以選擇。現時的螢光棒已非一支發光顏色棒咁簡單，還有豹紋、眼鏡形、球形，可謂層出不窮。此外，還有《百獸王》的激光槍、《幪面超人古迦》的佩劍TitanSawlow，全部入電發光，畀你過足主角癮。
中秋節玩光纖棒已不算新鮮，而呢款叮噹光纖棒就加入新的好玩元素。只要一按開關掣，一大束光纖不斷轉動外，還會不斷變色，「紅、黃、綠……」的慢慢變化，在夜空中比傳統光纖棒更靚。
售價：$30(b)
日本最新的《幪面超人劍》既然未登陸香港，我們便惟有玩玩前輩《幪面超人古迦》的佩劍TitanSawlow。外形未算做到十足十，不過發光的激光劍依舊好玩，而且軟膠劍身，唔怕劈親，夠晒安全。
售價：$10(b)
一套四支的螢光棒，夠抵玩之外，最吸引當然是其豹紋及虎紋的Pattern，夠狂野又特別。在夜空中揮動時更可繪成更有層次的畫面，中秋玩唔晒，留番落D玩都潮爆。
售價：$19.9(a)
《百獸王》除了有吹氣燈籠外，更有呢把發聲激光槍。只要一開槍，唔單止會有「啾啾」的槍聲，整把槍更會發起光來，光亮度絕不遜於一般燈籠。
售價：$10(b)
唔想再在中秋夜，漫無目的地攜着燈籠的話，不妨玩玩呢個螢光球。整個螢光球以幼身螢光棒自砌而成，可過足DIY癮，賞月時不妨與朋友來個螢光草地滾球賽，既可看到殘留的夜光，又可與朋友競賽一番。
售價：$9.9(a)
(a)吉之島 28846888 鰂魚涌康山道2號康怡廣場南
(b)崇光百貨 28338338 銅鑼灣軒尼詩道555號
(c)九九商店 27590819 牛頭角下邨九座九號地下
(d)新世界瓷器公司 25757065 銅鑼灣軒尼詩道432至436號地下
(e)Toyc 21101482 鑽石山荷里活廣場339號舖