喺每年遊戲界盛事嘅東京遊戲展（TGS）之前，就例牌淡市，大部份一線Game都到年底先推出，不過今年11月27日呢個檔期，就俾SQUAREENIX嘅怪物級大作《勇者鬥惡龍8》霸咗，相信其他廠商都會幾頭痛。講番今個星期，最好賣嘅竟然係《FFXIOnline》追加碟，相信好多人都估唔到，PS2版好多地方都賣到缺貨，市價由$260升到$310都有，反而Windows版就較為多貨，市價$290左右。今個星期其他新作好似《戰國無雙：猛將傳》定價$320，不過好多地方賣到$290都反應一般，睇嚟好快會跌價。而《跟猴子玩吧！手舞足踏鬧翻天!!》中文版，定價$308，反應就算唔錯，睇嚟EyeToy個勢會愈嚟愈好。而GBA隻《口袋怪獸：比卡超》就企住$290至$320，算係有價有市，不得不佩服比卡超嘅魅力。XBOX嘅《BURNOUT3》亦有唔錯銷路，相信會係繼《PROJECTGOTHAM2》之後最好賣嘅賽車遊戲。
文：打機鐵人