以恒指計，好淡和氣收場，國企續強，有國企帶住，個市唔會衰得去邊，有平貨要買。
長實C輪：九龍天光道與新蒲崗兩幅政府地相繼於本月7日及8日勾出後，地產股浮浮吓，冇着數到，而樓市則再升些少。兩幅地皮下月12日拍賣，估計拍賣前地產股會賀吓，買定地產股窩輪有機會搵米。長實（001）昨跌75仙，跌得多過其他大隻地產股，最有機會跑快啲。兩幅地皮究竟係邊個勾出，冇乜人知，只係一直傳係長實。到正式拍賣之時或之前幾日，若證明確係長實勾出，則長實股價刺激作用，將大過其他地產股。長實遲吓推出渣甸山項目（前虎豹別墅），據講意向呎價萬四，對長實亦係利好因素。
長實C輪主角係2249，昨收72仙，跌6仙，最諗得過。隻輪明年2月到期，溢價5.4%，槓桿率9.5倍（有效6.1倍），引伸波幅31%。
滙控C輪：一波最近推出兩隻滙控C輪，4440與4441，兩隻昨日都係收52仙。4440明年3月初到期，溢價3.7%，槓桿率23.8倍（有效12.6倍），引伸波幅15%。4441明年6月尾到期（長過4440達3個半月），溢價4.5%（較4440高0.8個百分點），槓桿率亦係23.8倍（有效10.8倍），引伸波幅15%。兩隻比拼，揸4441着數啲。
中電信C輪：中電信（726）收2.625元，升兩格，前一排跑得慢，有炒落後可能。揀中電信C輪短炒，主角係2149與2219。2149收18.7仙，數據靚過2219少少。2219收20.5仙，買賣則易過2149，1日成交50球。
章盛