金源米業太子林炯偉嘅太太，即前亞姐樂蓓，噚日親臨富豪集團總部簽約，以七千八百萬，買入赤柱富豪海灣臨海近五千呎大屋，呎價萬六，話就話打算長揸收租，不過計落，回報唔夠三厘，似乎低咗啲喎。
樂蓓雖然咁高調買樓，不過對於記者唔算尖銳嘅提問，佢一律以冇統計、唔想講等理由迴避，重叫記者畀番啲私隱佢。
蘭西覺得好矛盾，既然佢話買樓投資係私隱，唔想多講，咁點解又要搞個記者招待會，喺十幾部攝影機面前簽約呢？
講開名人買樓，之前中國星董事向華強太太，喺富豪集團老細羅旭瑞同副主席蔡志明陪同下，勞師動眾去到富豪海灣睇樓，翌日發展商重call齊記者，話向太決定入市，下晝上去寫字樓簽約，點知臨門一腳賣唔成。點解向太話買又唔買，發展商並無解釋。
不過，再有名人入市，發展商都學精咗，到買家落實簽約，先叫記者到場，為免重蹈覆轍咁瘀啦。
收舊樓考耐力，美聯工商部經理吳偉華話，堅尼地城發售中單幢新盤綠意居，附近有座天隆工業大廈，剛由發展商完成收購全幢業權。錢用咗逾億；光陰就花掉十載。
物業可重建為商住樓，每呎樓面地價千二，抵過最近大型發展商勾地價。
市場人士都以為，收購者係綠意居發展商置地，但據蘭西了解，置地雖然曾經研究過呢個項目，最終卻不為所動。反而本地薑恒基，聞說已持有天隆工業大廈部份業權，可能係今次大手收購嘅真命天子。
新聞多多嘅藝人張栢芝，曾經住過嘅大埔康樂園大屋，近日又再易手，比起佢舊年賣屋時個價，足足升咗七成。
中原吳炳深話，栢芝間康樂西路單數屋，花園同間屋都一樣三千五百呎，○一年購入價一千二百萬，舊年九月以一千四百萬賣咗畀個用家。近排間屋以二千三百五十萬轉售。假設栢芝遲一年先賣屋，應該有一千一百五十萬進帳，睇怕咩嘢債務糾紛都可以解決咯。
新地荃灣爵悅庭雖然未賣，但係軟銷工作呢幾個禮拜未停過，發展商自己有活動，代理又要搞宣傳，所以有心想買嘅買家，重要畀多啲耐性。
噚日就輪到美記出招，幫爵悅庭嘅四個複式，搞咗個命名比賽，只歡迎自己前線職員參加，獎金五千，今個星期四截止。
新地代理總經理周國賢做嘉賓評判，佢笑言，得獎嘅名稱未必會採用，不過獎金就照畀。至於買家最關心嘅資料，周國賢話，聽日會約埋樓盤項目經理見傳媒，到時會有圖則設計等資料公布，叫大家再等一等。
地鐵搞旺商場，向來計仔多，嚟緊嘅十一黃金周，地鐵就借用百貨公司大減價概念，喺旗下德福廣場、青衣城同埋杏花新城，舉行「火熱瘋狂購物日」。十月一號當日，只要喺以上三個商場消費滿八百，即可換領一百蚊購物現金券，每個場有二千個名額，先到先得，總值六十萬。現金券有效期兩個月，無附帶使用條件，適用於地鐵商場八成商戶，超過四百間商舖。
放寬民企自由行，唔止對寫字樓有利，住宅市場亦都多咗呢批買家。港置區域經理葉明輝話，剛剛有位嚟自天津，從事金融界嘅民企買家，買咗個西灣河嘉亨灣單位，三座高層B室，一千五百三十一方呎，成交價一千五百萬，呎價九千七百幾蚊。
葉明輝話，呢位天津買家，經常要嚟香港工作，睇啱嘉亨灣，都係因為樓盤附近將會起中港客運碼頭，將來可以方便往來。葉明輝覺得，今次成交，可見內地資金開始流入香港，長遠有利樓市。
蘭西
電郵地址：
