AC米蘭隊長馬甸尼係長青樹，至少重有一兩年貨仔，不過AC方面已未雨綢繆，副會長加里安尼近日宣布未來隊長誰屬。當大家以為準隊長多數係舒夫真高或者尼斯達時，加里安尼講嘅人選都幾出人意表──「鬥牛㹴」加度素是也！
近年AC正印隊長，例如巴里斯、馬甸尼，或者做過代隊長嘅哥斯達古達、李安納度、舒夫真高同岩布仙尼等，都幾有台型；假如加里安尼唔係開空頭支票，由外形粗獷、有啲騎呢嘅加度素繼位，都算異數。
不過平心而論，加度素近年進步好大，已經唔似當日只識亂衝亂撞，好似禮拜贏博洛尼亞場波，助守助攻，表現獲得認同；雖然佢唔係AC青訓產品，但總算喺AC成名、成長，同尼斯達、舒夫真高唔一樣。AC視如己出，將來對佢委以重任其實都係合理。
雖然我求大俠近日批評過王子托迪操行麻麻，但佢愛護隊波，盡好隊長本份始終要讚。話說前日羅馬作客墨西拿，托迪因傷無跟大隊，但佢眼見球隊軍心渙散，開賽前坐私人飛機趕去西西里打氣；雖然球隊最後都敗走，但托迪總算有心。好似王子咁一來一回，未必個個都制。
繼S恩沙基減薪六成肯留效拉素後，另一老臣子尼古路亦打算同會方續約，一早做晒減薪準備，點估到會方好狠咁向佢開出年薪得三十五萬鎊嘅條件；據報大概得原來薪酬三成左右，基本上同趕人走無分別。尼古路𠵱家同球會合約到季尾就完，都係時候講拜拜囉。
熱刺迪科毫無疑問係今屆英超聯其中一個當弗射手，不過如果對手想阻止佢嘅話，終有辦法喇！因為二十一歲嘅迪科自爆天不怕、地不怕，淨係怕蜘蛛；重話試過因為喺浴室見到蜘蛛，而裸跑衝出嚟。如果對手係迪科出賽前令佢見到蜘蛛，相信佢一定會表現走樣。
保頓呢排成績理想，但領隊艾拿迪斯突然放風，指可能會離開保頓，皆因球會無法支持佢嘅理念。艾拿迪斯早前講過點解未能過檔紐卡素，近期最有機會轉領球隊就只有曼城同修咸頓，前者無資金擴軍，後者會長麻煩搞到領隊不停轉；我求大俠覺得兩間都揀唔過，除非曼聯……