北京大執位，江爺出局，胡溫得勢。下屆特首將會點樣擺局，呢個話題日漸蓋過長毛大班等立法會嘅動物園化現象，今年下半年，香港政治氣候肯定會雷暴交加，間中有陽光。
據北方嘅知情人士講，胡溫上位，香港全線告急嘅，唔係民主黨，而係「商人治港」成個概念。當初江總高調握手欽點董商人，點知呢七年來，「商人治港」變為「商人禍港」，經已證明係一張充滿赤字嘅成績單。
胡錦濤喺四中全會高調點明要保障香港繁榮安定，即是話香港問題，從此正式歸納入胡溫新政嘅權力範圍，咁下屆特首人選，當然唔到阿曾（唔係煲呔呢個「細曾」，亦唔係金利來嗰個「烏曾」，亦唔係保皇民建聯23條沙沙滾嘅「沙曾」，佢亦坐鎮華夏權力中心，所以叫「唐曾」）話晒事，而係我哋胡主席漸漸有強大發言權咯喎。
胡溫新政，關懷弱勢社群，喺大陸，佢哋嘅強項就係替民工向老細追討工資，嫉無良奸商資本家如仇，加埋又尊崇毛澤東，鍾意去吓西柏坡呢亭地方踎喺處同啲老農食吓餃子，下屆特首重畀「商人治港」，有冇搞錯？睇怕下次好快六十名議員上京，胡錦濤會單獨會見吓我哋長毛，吸取吓呢位香港無產階級革命家嘅意見，話唔定大家傾得埋，長毛可以做特首㖭。
弊就弊在現時特首人選，經已拉晒出沙圈等入閘，計有唐唐、煲呔、太子章、振英哥，最近行情上位嘅甚至包括田少及正少。田正二少重可能俾阿董招攬入痕正會議，加入同阿董集體𢱑痕嘅行列，重話呢樣係「中央」意思㖭。
不過，經「九一九事變」江爺落台，中央亦都整咗個容，唔同咗look，上海幫逐步失勢，「商人治港」唔係咁啱胡溫新政聽，沙圈中動物，首先告急嘅應該係頭號「上海寶貝」嘅唐唐咯。
田少拉「上海寶貝」衫尾，唐唐坐正，田田可能有政務司司長做，可惜7.1反骨大行動，田田當日傷害咗國家感情，雖然佢先幾日想補飛，但人哋胡溫有冇咁易對佢怒火降溫呢？
剩番個正正，就更加有少少騎呢嘞。來人指證，中央並冇點名要佢入痕正會議，而阿董身為船王敗家第二代，所謂既生瑜何生亮，對於守業有成嘅正哥，點都有少少眼紅。
邀請正正入局，又點會comfortable？
正哥除咗係商人，重好有政客本色，佢識得幾時講嘢，幾時shutup，傳佢會入局，佢就暗示唔會加入。若然有人爭先揚言話得中央賞識，想佢入痕正會幫手𢱑吓痕，然後佢又自謙話何德何能，係咪變咗入會固之然贏，係中央欽定下屆特首大熱，唔入會，亦係因為堅持佢自己唔熱衷名利？
北京方面人士話，胡溫上位，下屆特首誰屬，由於係懸疑劇，肯定會有好多自編自導自演嘅好戲，唔怪得連烏曾都睇唔過眼，勸胡溫唔好咁快拍板，睇定啲喎！
傳真︰2623-9278
電郵︰