四中全會閉幕後，胡錦濤順利接掌軍權，中資股繼續聞歌起舞，十大成交股份中，除滙控（005）及新地（016）外，全數被中資股霸佔，其中中國鋁業（2600）勁升10.73%至4.90元，成交高達8.11億元，中石油（857）就更值得留意，成交高達10億元，但股價只升1.24%，反映沽盤規模唔細，可能有大戶趁好市出貨，若果沽貨者是畢菲特就麻煩。現時期油在高位反覆，市場正在觀望幾時爆煲，現在沽石油股合情合理。
中資股表現強勁，但藍籌表現就麻麻，和黃（013）受到和記電訊國際（2332）招股規模大壓縮拖累（和黃套現金額大幅減少至77-88億元），收62.50元，跌0.39%，加理滙控跌0.4%至123.50元，恒指全日跌3點，收報13221。
美聯（1200）今日公布業績，雖然公司先前因一手樓削佣所發出的盈利預警未正式取消，但市場預期公司受惠樓市復甦，錄得正到痹的中期業績，淨係睇佢對手中原地產半年稅前利潤大升2.41倍至2.39億元，就知美聯唔會衰得去邊。不過噚日未見有人偷步入市搶高股價，唔通股民認為股價早已見頂？美聯噚日收報2.85元，升0.88%，成交2704萬元。
銀建（171）噚日停牌，話要公布須予披露交易。黑客話早前聽到銀建想發可換股債券進行收購，可能係噚日停牌的主要原因。不過另外有傳聞話信達資產會醒多啲資產畀佢處理，等佢賺多啲佣金。銀建中期業績內有一筆7000萬元收取信達的佣金入帳。
阿虎