江澤民唔再做中央軍事委員會主席，全港六百幾萬人都望住老董，唔知佢識唔識得跟章，實踐儒家精神，跟隨主人辭埋一份，以謝江主席知遇之恩，同主席共同進退。
之不過，老董有言在先，話過「退好容易，留低先至難」，所以現實嘅佢，未必肯伴老江喺北京香山唱英文歌跳牛仔舞。當然決定權喺中央，點知胡溫忍唔忍得咁耐，至於以為已經跑到直路嘅唐英年更加係行情分分鐘有變。
八方問king-maker飛哥點睇？佢話中方都未定第三屆屬意邊個做，所以好難講唐唐有冇受影響，唐家同江主席關係密切，唐家又係上海幫，所以成頂頭大熱，只要搞掂香港經濟應可過關。
唐英年目前人在上海，噚日為「香港金融服務博覽」主持開幕禮，今日就坐車返無錫老家，星期三出席一個CEPA嘅會議就打道回府，出席國慶活動。
另外，中央台噚日重同唐唐做咗個專訪，遲吓喺經濟頻道播出，阿松當年就冇咁多搞作啦。
（圖）唐英年（中）喺上海為「香港金融服務博覽」主持開幕禮，透露國企咁多年喺香港融資近九千億，數目都唔少。
傳真︰2623-9278
電郵︰