選舉過後，好多當選人都乘機去外地度假，事關過去一兩個月的確好辛苦，而立法年度一開始，亦有仗要打不便走開。
挾無敵姿態參選嘅鄭經翰上個禮拜尾飛咗，你估呢位民主派大哥去邊？就係去四川。果然係膽識過人，明知山有虎都冇有怕。八方聽聞大班睇完九寨溝山水之後呢兩日就會回港，跟住會輪流請友好食晏，多謝支持。
一度因何秀蘭落選而耿耿於懷的李柱銘，就飛咗去法國。佢雖然唔好飲酒，但就話可以試吓美食。臨離開時馬丁仍不忘叫八方幫佢澄清──佢真係當晚成十點至知何秀蘭可能輸。顯然，馬丁仍然未放低呢件事。其實做大事何拘小節，勝敗乃兵家常事。事後孔明容易做，有心挑撥離間者的言論，更加唔使理。香港咁多選民唔想你輸，係值得開心先啱。
傳真︰2623-9278
電郵︰