中國官方終於宣布，中共中央軍委主席江澤民終於都肯遞交「辭職信」，交出把槍，由胡錦濤坐正！
內幕權威消息，今次又係由美國佬第一手奪得，《紐約時報》全球獨家披露，證明美國佬嘅權力冠蓋全球！美方權威公布，中國官方半隻字都唔敢否認，除咗江澤民個外甥有氣冇力咁「澄清」咗幾句，一開牌，卒之又證明《紐約時報》無可匹敵嘅公信力！
老江「辭職」之後係咪全無影響力，當然冇人敢寫包單，因為今次「軍委副主席」陣容龐大，其中郭伯雄、徐才厚，係老江頭馬（直到四中全會之前，郭伯雄重話「軍隊在任何情況下都聽從江主席指揮」），至於國防部長曹剛川，最近則成功過底，爆響口話「團結在以胡錦濤為首嘅黨中央周圍」，究竟聽邊個說話、團結喺邊個周圍，兩個中央，兩副喉舌，兩種說法，直到二十四小時之前，先至叫做暫分勝負！
其實，江主席兼任多軍委主席兩年，雖然理論上唔應該耐得過六四之後嘅鄧小平，之不過，前清乾隆皇帝做太上皇，指導嘉慶執政，都做咗成四年咁耐，江主席如果想做落去，根據我國國情，都重有空間，𠵱家佢主動放棄，今時今日，國際鬥爭形勢咁複雜，我哋敬愛嘅江主席，又有咁豐富嘅人生經驗，精通中外文學、哲學、歷史，又深諳多國語言，正所謂「家有一老，如有一寶」，江主席若然從此真係不問世事，閉目養神，國家點有方向，十三億人民又何所適從咁呢？
遠嘅唔講，淨係香港嘅阿董，佢靠江主席一手帶大，哺育長大成人，江主席一走，拖住一堂口水鼻涕嘅小兒女，做人處世，重缺乏足夠嘅指導，試問係幾咁彷徨呢？
尤其係有好多流言，話胡溫哋甚至阿曾（唔係煲呔曾）都好唔妥阿董，垃圾會啱啱選定，阿董至話鬆啖氣，話好comfortable，點知後面嗰位握過佢手拖佢返學嘅阿媽就咁放咗手。咁稚嫩嘅小朋友，從此一個人返學，唔知會唔會驚到喊，甚至因為冇家長肯再同佢簽手冊，而被校方勒令退學呢？呢個問題相信會困擾我哋一排喎。
傳真︰2623-9278
電郵︰