近日全城最矚目嘅新聞，莫過於立法會選舉；不過，大使知道近排喺社區，好多公公婆婆都交頭接耳討論緊削減綜援問題。
事緣政府將由下月正式向全港近十九萬名高齡、殘疾及經醫生證明為健康欠佳人士，落實第二期削減綜援計劃，今次嘅減幅大約百分之五，連同去年嘅第一期，累積減幅達到百分之十一點一。另外，租金津貼喺過去一年亦有約百分之十五嘅減幅，由原來嘅一千五百蚊，減至一千二百六十五蚊。
呢個削減綜援計劃，最受影響嘅係一班租開私人住宅單位嘅長者，每個月生活費連同租金津貼，可能一下子唔見咗五百二十蚊。老人權益中心嘅長者就同大使呻，減綜援令好多老人家生活更加淒涼，卜伯係其中一人。
卜伯有嚴重哮喘病，每個月要花唔少錢買藥，又要負擔一千五百蚊板間房租金，銀包本來已經好緊，點知政府重要再減佢五百幾蚊綜援金，搞到卜伯冇啖好食，生活好艱難。
大使惟有喺度呼籲大家，多啲關心身邊嘅長者，蘋果日報慈善基金一直都有幫啲弱勢嘅公公婆婆，重特別成立咗啲專戶幫助長者，包括平安鐘專戶、電器贈長者計劃專戶等等，蘋果基金好需要大家嘅支持，共同推動敬老護老精神。
暖流熱線
電話：29908688
傳真：23702192
電郵：
網址：