上周五，因為墨西哥灣打風影響石油生產，油價急升，全周升幅達3美元，其中1.71美元喺上周五出現。不過美股冇受到影響，周五杜指升40點。港股走勢，短期反覆向上。
電盈C輪：上周五平淡市況中，電盈（008）有異動。開市冇耐，成交量已逾20球，超過周四成交量（16球），全日共成107球，半年幾未試過咁多，最高5.40元，收5.30元，進帳0.10元。成交金額5.64億元，大增6倍，打入第7位，買家銀彈咁大隻掟落去，必有下文。公司與國內網通合作，相信好快揭盅。
醒目錢撲落電盈C輪9866，收29仙，升達17.4%，成交量由12球大增至78球（發行量只係100球）。隻輪年底到期，溢價12.4%，槓桿率18.3倍（有效7.6倍）。上周五推介嘅9814，由56仙上到60仙，成交量由12球大增至71球（發行量148球），金額4千幾萬。呢隻輪由冷變熱，升火待發，明年1月到期，溢價5.4%，槓桿率8.8倍（有效5.9倍）。賭電盈C輪，揀9814。
恒指C輪：上周恒指升220點，恒指C輪9911收20.7仙，一周升16%。9911係同類輪主角之一，溢價低，跑得唔慢好應該。新簇簇嘅恒指C輪4442，因為溢價較高，上周跑輸畀9911，收21仙，只有1仙進帳。明年3月底夠鐘，溢價5.1%，槓桿率14.6倍（有效8.2倍），勝在引伸波幅得22%。單日成交563球，佔發行量63%，成交金額1.19億元，其他輪冇隻夠佢勁，唔怕冇貨買，亦唔怕甩唔到手，可以留意短炒。
章盛