民主黨大腦羅致光IQ高達160，原來重係堪輿學專家，對姓名學特別有研究。雖然民建聯蔡素玉贏咗港島一席，搞到負責選舉事務嘅羅致光被千夫所指，但撇除政見，羅致光同蔡菜子其實老友鬼鬼，原來蔡菜子個姪孫女要改名，都有搵羅致光幫手諗改乜名㗎。
羅致光噚日喺港台《舊日的足跡》節目度話，雖說佢係大學畢業後先至第一次做IQTest，但讀書嘅時候其實已經知道自己IQ特殊，因為由小一到中五，佢冇一條數係唔識計，考A-Level數學要考三粒鐘，佢就只係用咗四十五分鐘已經計晒啲數。
羅致光呢排咁當黑，搞選舉又失利，返大陸又被沒收回鄉證，不過佢仍大讚上海嘅邊防人員「文明」，當日安排佢喺貴賓廳等，又有電視播放劉翔跨欄特輯，「睇住劉翔由十三秒幾跑到十二秒」，同邊防人員有傾有講，人哋重教佢某啲俗語用普通話點講㖭。
傳真︰2623-9278
電郵︰