由張衞健同謝霆鋒主演嘅劇集《小魚兒與花無缺》近日喺內地懷柔片廠拍攝，噚日有消息話飾演江別鶴嘅內地演員王伯昭被張衞健毆打十幾拳，王伯昭被打到口腫臉腫，重成口鮮血，激動到要求報警求助。
馮仁昭即時聯絡該劇嘅監製王晶，佢話今次只係一件小事，其實當日劇情係講「小魚兒」張衞健同「花無缺」謝霆鋒要教訓殺父仇人王伯昭，當時張衞健只係因應劇情需要掌摑對方兩巴，絕對唔係報道所講嘅十幾拳，王晶話：「其實早前王伯昭情緒唔係咁好，亦都有同工作人員鬧過交，佢被健仔打完之後，情緒好差，重話要報公安，我唔想大家話我偏幫健仔，所以即時搵個工作人員陪王伯昭報警，公安就話事件係拍戲作出嘅行動，所以最後都冇受理。至於健仔就冇嬲佢，重話會體諒佢㖭。」而王晶事後亦都有安撫王伯昭，重強調絕對唔會因為今次事件而易角。
不過有份拍攝此場戲嘅謝霆鋒噚日喺北京宣傳《新警察故事》時就話喺印象中從來都冇一場戲要打同劇嘅演員，重話喺佢立場嚟講呢個係一個笑話。唔通霆鋒患咗失憶症，連自己拍過乜戲都唔記得，《小》片係武俠片，飾演花無缺嘅霆鋒冇理由會冇動作場面喎！
張曼玉（Maggie）嘅玉寶表前行政總裁男友GuillaumeBrochard，昨午揸住Maggie嘅車去淺水灣酒店為Maggie慶祝生日。Maggie好友梁家輝當時已在餐廳等候。約兩個鐘頭後，Guillaume獨自揸車返回女友香閨，而Maggie就同梁家輝坐另一輛車返屋企，直至傍晚家輝才離去。
伍佰同陳綺貞前晚喺台灣表演，之後伍佰提到年底發行嘅個人第二張台語專輯，佢話：「我討厭現在的流行歌，我不想跟大家一樣炒冷飯。」不過批評還批評，要佢直接「點名」佢就唔敢，佢重話：「我不想當李宗盛，我不想講！」
Rosemary噚日喺中環為時裝騷任模特兒，問佢日前開party拖住嗰個男仔係唔係佢男朋友？Rosemary話：「我哋只係朋友，佢嗰日不過係好有風度咁扶我啫！」問佢同呢位男士有冇機會發展？Rosemary就話：「我唔講呢啲嘢嘅。」而佢前晚同媽咪去尖沙嘴出席活動，講到呢位男士時，聽到佢阿媽同Rosemary講：「低調啲啦，唔係一陣又散呀。」
張信哲之前去咗長沙為一個中央台晚會演出，回程時不幸遇上車禍，佢搭嗰架保母車，撞親一架衝紅燈嘅電單車，電單車上一男一女被撞到成個飛起。阿哲前晚喺尖沙嘴出席《星光熠熠耀保良》慶功宴，佢話：「當時見到佢哋血流披面，嚇咗我一跳，之後我有打電話問番兩個傷者嘅情況，個男司機就腦震盪，女乘客只係擦傷，不過兩個都冇生命危險。」
Boy'Z噚日為佢哋代言嘅飲品出席喺尖沙嘴一間便利店嘅活動，佢哋重以廣告中入面嘅造型出現，相當搞笑。Kenny就笠咗個蜜桃喺頭，而Steven就笠咗個茶壺，Steven重話：「拍呢個廣告都幾辛苦，因為我個茶壺入邊有水，好重，笠咗喺頭之後差啲郁唔到，重辛苦過吊威吔。」
