王家衞拍攝五年始完成的電影《2046》終於上映有期，昨日該片在上海舉行記者會，演員梁朝偉、劉嘉玲、王菲和張震談到演出感受時，異口同聲指拍攝此片是一種折磨。
王家衞拍攝五年的《2046》下周三將在中港兩地上映，昨日他率領該片演員梁朝偉、劉嘉玲、王菲、張震和董潔，在上海Ritz-Carlton酒店出席新片記者會，而木村拓哉、章子怡和鞏俐則因工作檔期不能配合而缺席。昨日除董潔外，幾位演員均對王家衞有微言，並異口同聲說：「拍王家衞的《2046》真係一個折磨。」
鍾意唱歌多過拍戲
《2046》前後拍攝了五年，對參演的演員來說自然是一件苦事，因為不時要為度期開工而苦惱，難怪王菲昨日在記者會上衝口而出說：「一開始拍呢部戲已經係折磨。其實我唔係針對王家衞，因為我鍾意唱歌多過拍戲，但部戲實在拍得太長時間，的確拍得幾辛苦。至於我同木村嘅親熱戲，我冇乜特別感覺。總之再同王家衞合作我唔怕，我會覺得係一種挑戰。」近日有報道指王菲與內地演員李亞鵬訂婚，她昨日被問到此事時，先是沉默了一會兒，然後才笑說：「今日唔講呢啲啦！」
而身為王家衞老拍檔的梁朝偉亦承認拍此片是一種折磨，因為他在片中佔戲最重，所以近五年來付出了無數時間拍攝。偉仔說：「其實初時拍呢部戲我都唔覺係折磨，但拍咗六個月後，我就有折磨呢種感覺，拍呢部戲肯定比《花樣年華》辛苦，但我睇完拍出嚟嘅成品後，我好鍾意呢部戲嘅感情發展，王家衞的確係好有才華嘅導演。」
木村戲份略有增加
偉仔在片中與章子怡有一幕大膽親熱戲和露股鏡頭，他說：「𠵱家安排喺香港上映嘅版本，肯定同康城上映時嘅版本唔同嘅，除咗特技同音效加多咗之外，木村戲份的確會比康城上映嘅版本多番啲，但結局都係一樣，唔會有太大改變。」
提到緋聞女友張曼玉今日四十歲生日，偉仔表示不會為對方慶祝，他說：「唔會啦！買禮物都唔會有時間啦！因我有嘢要做。」
嘉玲指偉仔真男人
提到女友嘉玲早前接受電台訪問時，指偉仔心中依然有舊女友曾華倩的位置一事，偉仔突然將聲音壓低說：「我同華倩係好朋友，唔拍拖一樣會見面，我知嘉玲唔會覺得有刺，佢好成熟。」
至於嘉玲談到拍《2046》的感受時，她笑說：「我認為係有收穫嘅折磨，因為我欣賞王家衞，拍佢嘅戲好有意思。」談到偉仔與華倩仍有保持聯絡時，嘉玲說：「偉仔係有情嘅人先會對舊女友咁好，佢係真男人。」
此外，奧斯卡影后妮歌潔曼（NicoleKidman）早前表示將與王家衞合作，據悉二人合作的新片以三十年代的上海為背景，男主角暫定為日本男星北野武，而他的角色更會是一個奸角。
採訪、攝影：曾小嘉
