最近除國企股勁升之外，部份三四線股亦蠢蠢欲動。經紀陳話，皆因最近多咗人炒股票，如果唔趁家陣做嘢，都唔知要等到幾時？
經紀陳又話，即將改名做華藝銅業控股的星采控股（559），兩個月前完成收購大動作，連大股東地位亦出現變動，近日江湖傳聞幕後炒家想開車。
星采自從8月初完成向榮盛科技（1166）收購在中港兩地從事製造及買賣銅杆及相關產品的業務後，無論股價同埋成交都大升，星采股價由3仙起步，最高曾見過6.4仙，但近月來股價一直打橫行，傳聞係幕後大戶正在收貨之故，但搞咗咁耐，聽講已經收到差唔多。
星采明日公布中期業績，斷估唔慌有睇頭，但家陣星采的主要賣點係新收購的銅業，另外公司又即將改名，所以往績已經唔再重要。
另外，華翔微電（1195）將於9月27日公布全年業績，江湖傳聞業績見得人，有人諗住喺公布完業績後搞推廣活動。
華翔上周五冇起跌，平收0.83元，交投淡靜，只得48.4萬元。
慕容小初