意大利經典女星蘇菲亞羅蘭（SophiaLoren）今日慶祝佢七十歲生日，拍過超過一百部電影嘅蘇菲亞仍活躍影壇，早兩年亦主演過細仔Edoardo執導嘅電影《BetweenStrangers》㖭。六一年佢憑意大利電影《戰地兩女性》贏咗奧斯卡最佳女主角，成為歷來第一位演外語片封后嘅女演員，你都咪話唔巴閉。
至於今年蘇菲亞最好嘅生日禮物，莫過於睇佢同九十二歲電影監製丈夫卡羅龐堤（CarloPonti）生嘅三十五歲大仔CarloPontiJr.結婚。擔任過俄羅斯國家管弦樂團指揮嘅CarloPontiJr.，上周六喺匈牙利首都布達佩斯迎娶匈牙利籍小提琴家未婚妻AndreaMeszaros，佢哋兩個選擇喺當地最大嘅聖伊天大教堂舉行婚禮，身為父母嘅蘇菲亞同龐堤都老懷安慰。
當日嘅婚禮以一個比較私人嘅方式舉行，來自世界各地超過二百名賓客獲邀出席，其中包括為新娘子設計婚紗嘅意大利著名時裝設計師GiorgioArmani，之後一眾賓客獲安排喺歐洲第二大河多瑙河嘅美景之下食一餐豐富嘅晚餐。