呢期人氣急升嘅「長毛」梁國雄，喺新界東以六萬幾票高票當選，如果中學生都有權投票嘅話，呢位形象反叛、偏激嘅街頭戰士，分分鐘會做埋票王。明愛喺上個禮拜搞咗個青年模擬投票調查，發咗四萬幾張模擬選票畀全港總共九十四間中學，結果收返兩萬幾張有效選票，投票率接近六成，反映青年人對政治嘅興趣唔細。
除咗長毛以二千幾票當選做咗票王之外，喺今屆選舉落敗嘅何秀蘭、「阿牛」曾健成、陶君行、黃宏發、曹宏威、查錫我、嚴天生都紛紛當選。反而喺正式選舉當選嘅保皇黨蔡素玉、陳鑑林、李國英、張學明同民主之父李柱銘、民主大狀湯家驊同壞孩子陳偉業都落選。
負責調查嘅明愛青少年及社區服務社會工作督導主任林強話，結果反映咗年輕人需要政治新臉孔，而長毛形象反叛，迎合年輕人口味，所以咁多學生支持。
傳真︰2623-9278
電郵︰