近日羅馬麻煩事一籮籮，而托迪就批評舊教練卡比路軍紀不嚴、搞分化，要為今日羅馬亂局負責。卡比路聞言大怒，日前作出大反擊，直認教羅馬時叫過年輕球員迪羅斯咪群埋托迪、卡斯辛奴呢對「大小不良」，否則無前途。罵戰白熱化，呢幕「師徒莫問」應該重有下文。
卡比路話，以前教羅馬時的確叫年輕球員咪學托迪、卡斯辛奴，應以艾馬臣（已跟卡比路過檔祖記）為榜樣。卡比路認真唔畀面，咁樣講嘢肯定進一步打擊羅馬軍營士氣，高招！羅馬教練禾拉多得佢唔少。撇開陰謀論，其實佢番說話亦非無道理，托迪、卡斯辛奴紀律認真麻麻。點都好，下個月廿七號祖記主場對羅馬，恩怨情仇一朝了，到時有好戲睇。
NBA球星奧尼爾近日出席一項青少年籃球訓練時，又向前球會湖人開炮，話自己成為湖人無能高層嘅代罪羔羊，睇嚟佢真係憎到湖人管理層入心入肺，不過成日唔停口猛數舊球會嘅不是，真係小家啲。畢竟事過境遷，不如向前看為熱火喺新球季打爭氣波，以行動報仇咪重好。
曼聯隊長堅尼近日質疑領隊費爵爺近年引入南美兵嘅方針，理由係班南美兵成日要踢國際賽，每季留隊時間大概得一半，所以佢話除非好似大細哨呢類天才球員，否則南美兵真係咪制。並唔係歧視，近年踢曼聯嘅南美兵又真係唔多爭氣。唔知呢番話可否激發軒斯發奮呢？
今季轉投英冠韋斯咸嘅舒寧咸，季初入唔少波，但前日對葉士域治就射失十二碼。英國報章踢爆佢日前同位廿歲女子歡好，事前對女方大跳脫衣舞，跟住喺漫長嘅八小時入面同對方「交手」六次。「老馬有火」唔係唔好，但奉勸縱慾都要就住，響球場腳軟就唔好……。
法國射手安歷卡前日梅開二度，幫曼城作客砌低水晶宮，暫緩領隊奇雲基瑾壓力；我求大俠唔敢話安歷卡肯定可以打救基瑾，但至少話畀大家知咩叫投桃報李。話說以前當安歷卡發霉時，基瑾一直力撐，畀信心佢，所以安歷卡𠵱家咁賣力用入波報答基瑾，都算係佢之前播種得來啦。