今屆立法會不幸落選嘅民主黨立法會前議員黃成智，上個禮拜重喺人生嘅低谷處掙扎，但塞翁失馬，焉知非福，阿智話咁快就搵到新出路，加盟專門推廣生命教育嘅復和綜合服務中心，做生命教育服務總監。呢個結局既可解決生活問題，阿智又可以同喺嗰度做嘢嘅黃太（即係阿智太太）朝夕相對，真喺恨死隔籬。
八方噚日收到呢個好消息，第一時間打畀黃太恭喜佢。黃太話阿智不嬲都好積極面對人生，咁呢個新崗位真係啱晒佢做。阿智太太要長期洗腎，屋企層樓又係負資產，佢上個禮拜突然要面對中年失業，都咪話唔心驚。
好彩阿智慣咗樂觀面對人生，喺呢個人生嘅低潮，重得到親細佬城大副教授兼復和中心董事黃成榮博士睇重佢積極思考同面對逆境嘅寶貴經驗，誠邀阿智加盟。阿智今日召開記者會，講吓加盟復和中心之後有乜大計。八方喺度祝佢喺新崗位大展拳腳，四年後捲土重來。
傳真︰2623-9278
電郵︰