范曉萱自從同周浚偉甩拖後，上年十一月傳過同台灣「強力雞腿飯」樂團主音陳志雄（Allen）拍拖，今年佢兩個更不時俾人影到出入酒吧玩樂嘅相，不過范曉萱通常都話：「我是他的經理人，當然會常來看他！」
點知日前范曉萱就好高調咁同Allen拖手行街，話佢哋高調，因為佢兩個當時嘅打扮真係好怪異。其實范曉萱真係簽咗Allen，佢哋平日都會輕描淡寫咁否認緋聞，但日前兩個人似乎想以一齊出席公開場合嘅方式嚟公布戀情。上個星期三，范曉萱同Allen就出現喺台北仁愛路圓環附近，Allen打扮簡直可用怪異嚟形容，佢戴咗頂布帽，成面鬍鬚，驟眼睇好似恐怖分子「拉登」外，最誇張係佢左邊揹住一包嘢、右邊揹住一包嘢，好似走難咁，又着住水靴同攞住把遮，另一隻手就拖住范曉萱，真係周身唔得閒！
范曉萱嘅打扮亦唔輸蝕，佢着住對水靴都好襯佢男友嗰對㗎，佢日前喺台灣藝人魔術代嘅生日會上，同Allen坐埋一齊時重口口聲聲話：「我只是跟旗下藝人一起參加，並非男友！」睇嚟今次俾人撞到正，都好難再咁口硬咯。
第九屆韓國釜山電影節將會喺下月七日至十五日舉行，王家衞執導嘅電影《2046》獲邀成為開幕電影，前日套戲喺網上公開預售門票嗰陣，啲飛竟然喺四分五十四秒內賣清，而且同一時間更加試過有超過二萬八千人登入網站，你都咪話唔犀利。其他入圍嘅香港電影重有《江湖》、《蝴蝶》、《20：30：40》等。
梁詠琪（GiGi）噚天喺銅鑼灣出席「家家樂融融運動」嘅記者會，佢表示近來忙緊綵排舞台劇，雖然為咗呢套劇而推咗好多工作，但佢覺得自己從中學到好多嘢，而且佢對藝術亦好感興趣。至於近年尾冇唱片推出，會唔會驚影響年尾頒獎禮嘅成績，GiGi話：「唔會咁諗，只會做好每樣工作，冇理由每個工作都計可唔可以攞獎。」
關詠荷噚日喺銅鑼灣出席一個美容代言人嘅宣傳，馮仁昭見佢着上鬆身大肚裙，不知就裏就梗係即刻上前恭喜佢啦，點知擺咗烏龍，原來關詠荷只係整傷腰骨，要戴腰封先着成咁，重叫記者摸下，關詠荷笑笑口話：「我奶奶都未催我，不過都有呢個計劃，但第一件事要兩夫妻調理好身體先。」
繼沈殿霞（肥姐）喺兩年前入院割膽石後，佢個女欣宜早前又發現有膽石，重要做手術，事發係喺新加坡，欣宜做完手術都未出院，肥姐就要趕去內地做嘢，惟有叫工人即刻由香港飛去新加坡陪個女，肥姐話欣宜𠵱家積極去疤，希望可以着到三點式，但成件事欣宜老竇鄭少秋都唔知情，秋官俾人問起呢件事，好驚訝咁話冇人通知佢，重話要打畀個女問詳情㖭。
馬浚偉同鍾嘉欣噚日喺上環拍攝《皆大歡喜》，戲裏面鍾嘉欣演嘅角色好刁蠻，成日整蠱馬仔，搞到佢雙手打石膏，又成日掌摑佢，十足十野蠻女友一樣，難怪馬仔同馮仁昭呻話：「客串幾集都要捱打。」但係鍾嘉欣就兜番話：「現實生活當然唔係咁啦，我好好㗎。」
