寶貝智多星愈大愈曳
24歲麥哥利涉藏毒人贓並獲

九○年憑電影《寶貝智多星》紅遍全球嘅美國童星麥哥利高堅（MacaulayCulkin），近年不事生產，成日掛住玩，已經惹上唔少麻煩。前日佢同朋友喺奧克拉荷馬城，因為涉嫌藏有大麻同受管制藥物俾人拉返警署，有關方面已經決定落案起訴佢。

未能出示醫生證明
現年二十四歲嘅麥哥利，前日同朋友喺奧克拉荷馬城公路上風馳電掣，佢哋因為超速而俾警察截停。可能麥哥利同佢朋友個樣唔多妥，所以警方要求搜查佢架車，重喺麥哥利身上同車裏面搵到十七點三克大麻、以及包括八粒受管制嘅抗抑鬱藥Xanax及三十二微克鎮靜藥Clonazepam。因為麥哥利未能出示有效嘅醫生證明，結果警方喺當地時間傍晚六點，用手銬鎖佢兩個返警署問話。

三萬蚊保釋笑笑口
而麥哥利喺當晚七點半左右，以四千蚊美金（約三萬一千蚊港元）保釋外出。因為人贓並獲，警方已經決定落案起訴佢哋。前日佢離開警局嗰陣重笑笑口，睇嚟心情重好輕鬆。