【本報訊】「長毛」一直予人街頭鐵漢之感覺，但昨日出席電台節目憶及已故戰友吳恭劭生前遭歧視等遭遇時，罕有地流下男兒淚；談到近日遭傳媒貼身追訪，他坦言吃不消，激動得拍枱大呼不公：「傳媒問問題，好似撩鼻屎咁，撩咗舒服啲，撩完再撩！」
這位候任立法會議員昨一臉疲憊到港台接受訪問：「噚晚喺選舉慶功宴。」他似已抵受不了傳媒貼身追訪：「以前無人肯報道我，𠵱家一窩蜂咁，係過猶不及。」他又不滿傳媒「問來問去都係嗰啲問題」：「着衫嘅嘢由選舉到今日都係咁問！」
長毛說，考慮宣誓效忠《基本法》：「我係被迫，有啲選民都希望我可以入到立法會。」但主持人質疑：「咁可能另一半選民想你堅持，究竟你嘅底線係咩。」長毛被追問得禁不住瞪大原本惺忪的睡眼：「我嘅選民會明白，點解傳媒係咁jer住我！」他認為傳媒對「達官貴人」的態度卻不同：「你哋會唔會問曾蔭權做兩朝元老，係咪人格分裂吖。」他更激動拍枱：「對我唔公道。」
但當主持人談及長毛已故戰友吳恭劭時，「火氣」十足的長毛靜下來，聲音哽咽，多次激動得不能說話：「佢係幸運嘅，因為佢唔需要再受呢個世界歧視……我為俾人歧視嘅人感到不值。」他最後點了一首舊歌《再向虎山行》給亡友：「佢曾經喺法庭要求唱呢首歌，但法官只准佢讀啲歌詞出嚟。」長毛聽到歌詞後終於落淚：「平生勇猛怎會輕就範，如今再上虎山，人皆驚呼人皆讚嘆，人謂滿身是膽，何必勸我不要招麻煩。」
曾因塗污國旗及區旗而被定罪的街頭運動活躍分子吳恭劭，因患先天性淋巴腺閉塞影響肺功能，手術後受到感染，於○一年七月病逝，終年二十八歲。