銀行公會訪京團今日出發赴京，行程一連五天，訪問團嘅名單中，原本有一位重量級稀客──東亞銀行主席李國寶隨行，但據知埋門一腳，寶哥哥都係因為公務纏身，無緣跟任總同王冬勝訪京，改由該行執行董事陳棋昌代表東亞出席。
不過一向足迹無遠弗屆嘅寶哥哥，其實剛從花旗國回港，儘管去唔成訪京團，八方聽講佢老人家下周末又會去到上海，公幹之餘，亦會留滬觀賞一級方程式賽車，現場感受一下呢個超快感嘅競賽。
據聞寶哥哥跟住呢兩日留港期間，都唔會浪費時間，佢周二獲邀以「法國文化年」（香港）榮譽委員會主席身份，出席由法國駐港總領事館主辦的「法國文化年」推介活動，看來寶哥哥對法國確係情有獨鍾。
講開又講，中國喺世界嘅地位愈來愈重要，連一級方程式賽車今年亦首度搵中國搞，喺上海國際賽車場舉行其中一個分站賽事。該賽車場規劃面積五點三平方公里，可容納二十萬人，嚟緊嘅一級方程式賽事會一連三日舉行，由九月二十四日至二十六日，頭兩日係練習賽同排位賽，最後一日就係正式賽事。
（圖）寶哥哥原定今日訪京又去唔到，不過下星期就會去上海睇賽車。
資料圖片
傳真︰2623-9278
電郵︰