施念慈和陳鴻業分別簽了離婚協議書，正式結束這段未夠兩年的婚姻。施念慈以前認為另一半花心可以接受，如今終於醒覺，知道這是個愚蠢的想法。回想當初相識一年、便與比她年輕五歲的陳鴻業閃電結婚，這兩點碰巧與日前也宣布離婚的港產丹麥王妃文雅麗不謀而合，原來世間難有童話，施念慈會抱着更小心的態度找好男人。
施念慈（Celia）和陳鴻業結婚不到兩年便婚變，兩人上周已達成共識，各自在律師樓簽了離婚協議書，三個月後，施念慈便正式回復自由身。今年三十歲的施念慈向來情路多崎嶇，與陳鴻業結婚前和蔡康年的一段情曾糾纏不清，分手時更弄至報警處理。有人認為施念慈不幸，但她稱沒有後悔過結婚，因為彼此曾經深愛過。
當初施念慈和陳鴻業拍拖一年便閃電結婚，而且男方年紀比女方細五年，碰巧當年港產王妃文雅麗也是跟少她五年的丹麥王子約阿希姆拍拖一年便結婚，對於港產王妃宣布離婚，Celia頗有感觸地說：「其實好多夫妻都有問題，不過自己做娛樂圈，所以個個都睇到，其實挫折個個都有，我唔後悔結過婚，畢竟大家都深愛過對方，我唔會怨人，亦唔會怨自己，可能我阿Q精神，希望下次會美滿啲。」
施念慈續說：「離婚當然係一件唔開心嘅事，我曾經愛過佢，𠵱家亦唔係唔愛，但係大家相處唔嚟，長痛不如短痛，一對夫妻既然緣盡，點解唔做番朋友呢？我同佢分開之後，或者關係重會維持得好啲，𠵱家我仍然關心佢，但只係朋友之間嘅關心。」
施念慈向來認為大部份男人都花心，所以發現老公去滾亦會原諒和接受對方，如今她發現這個想法很愚蠢，她說：「我覺得男人對感情唔係咁理性，加上好多女人見到男人條件好就黐埋去，所以我覺得可以接受。」
Celia續說：「後尾我覺得呢個諗法看似大方其實愚蠢，要畀男人知道唔可以咁過份，所有嘢都唔可以超越條底線。或者我俾人嘅感覺係男人點錯都唔會走，但我亦有底線，如果覺得唔開心我就會走，雖然曾經我哋係開心過。」
隨着年紀漸長，施念慈表示自己的底線亦愈定愈高，她說：「我覺得對朋友又好，男朋友又好，如果成日都表現唔嬲嘅話，對方就覺得可以再過份啲，以後我嘅原則性會強啲，你要有第二個，唔好畀我知道。」
雖然施念慈比丈夫陳鴻業大五年，但她仍堅持以後拍拖並不因年齡而有所限制，Celia說：「年紀唔係問題，有啲人十八歲思想好成熟，有啲人四十歲都唔化，成長環境同埋朋友影響好重要，以後再拍拖，亦會放長雙眼了解多啲先作決定，唔會再咁鹵莽。」
問施念慈可擔心離過婚會嚇怕一些男人，她說：「我覺得真係鍾意一個人，唔會理會佢嘅過去，就算佢結過婚有仔女都唔會介意，甚至佢做過錯事都好，只要改過亦冇問題，而我只係離咗婚啫，又冇害過人，如果咁都介意，呢啲男人唔要都罷。」
