張栢芝、張豪龍、官恩娜、Boy'Z和姚樂怡等人，昨日齊到北潭涌出席「福幼慈善花式滑水同樂日」，栢芝於女子初級組滑水比賽中奪得第四名，不過在眾多藝人中，則以Boy'Z的Kenny及姚樂怡技術稍勝一籌。
栢芝透露已與環球唱片公司續約，年底推出大碟，她說：「我已經推咗五、六部戲，希望俾人覺得我唱歌有進步。」栢芝又多次表示希望與記者關係修好，她說：「我唔再睇任何報道，寫得唔好我又會同記者關係唔好，我個人已經平復晒，至於緋聞我唔係唔想答，只係我冇拍拖，話我同霆鋒復合冇可能，我同佢係一世嘅朋友。」
栢芝又指與霆鋒不會有任何復合機會，她說：「我唔想再糾纏，咁對我好唔公平，有報道話霆鋒同阿菲分手，咁唔代表佢哋分手後我同霆鋒都一齊番。」問到她是否因曾與對方拍拖而覺得雙方不適合，栢芝答：「唔係呢個問題，唔需要分手後屈我復合，我可以繼續同佢合作。」最後栢芝更表示不想被拍到購物的照片，她說：「我買嘢又話我亂使錢，我去玩又話我爛玩，所以我戒咗蒲有年半時間。」
採訪：李珮洳
攝影：仇志德